I-бөлимге өтиў

Өзимди қоярға жер таба алмай тынышсызланып турман. Бексултанға не болды екен, неге телефоны өширилген, қасындағы сол жақтағы жораларын да танымайды екенмен. Мине кеште болып қалды. Үйге қайттым, кейпиятым түсип кетти. Үнсиз бөлмемде отырман. Телефоныма қоңыраў келсе бирден жалт қарайман Бексултан шығар деп, бирақ әттең оннан хат хабар жоқ.

Ертеңине азанда Бексултанның жорасы Ринатты көшениң басында көрип қалдым ҳәм болған ўақыяны айтып бердим. Ринат ҳәм оның менен жақын арада сөйлеспеген екен.

Кешки ўақыт. Телефоныма бийтаныс номерден қоңыраў келди. Телефонымды дәрҳал алдым. –Алло, қалайсаң деп гәп баслады Бексултан. Оның сөзин бөлип, ашыўлы түрде оны сораўларға көмип тасладым. Ол телефон номерин өзгерткенин, усы ҳәптеде аўылға қайтпайтынын, мени сағынғанын бирақ оқыўлары тығыз екенин айтты.

Сөйтип, ол бурынғы ға қарағанда кемирек қоңыраў ететуғын болды. Телефонда сөйлескенде де ең көп сөйлейтин мен. Оның тек сораўларға қарағанда жуўаплары көп болды. Усы ҳәптедеги қарым-қатнасымыз өзиме суўығандай көринди.

Мүмкин жоқары оқыў орны болғаны ушын оқыўлары тығыз, ҳеш нәрсеге ўақыт таба алмай атырған шығар. Деген менен иш-ишимнен жаман ой кетпеди. Мүмкин меннен басқасын унатып қалған шығар.

Усы ҳәпте дым әстен өтип атырғандай болды.

Бүгин шемби. Кеўил кейпиятым көтериңки. Себеби бүгин Бексултан аўылға келеди. Оны жол тәрепте күтип алдым, күтип алдымда қушағыма басып көзиме жас келди. Бул сағыныш жасы еди. Мен үнсизбен. Ол өзиниң шырайлы ҳәрекетлери менен кеўлимди көтериўге тырысты. Кеўилли түрде “қалайсаң, мени сағынғаның көринип тур, мен ҳәм сени сағындым” деди. Оның оттай жанып турған көзлери мени интизар етти. Ҳәр кимдики өзине айдай дегениндей мениң Бексултанымның келбети жүдә шырайлы. Бирақ оның кийиниў усылы бираз өзгерипти. Соңғы үлгидеги кийимлери оны жәнеде көркем қылып көрсетип тур. Бирақ ҳәзил аралас гәпине қарағанда минези өзгермеген. Мен бахытлыман.

Түски ўақыт. Әдеттеги ушырасатуғын ески көпир қасында отырмыз. Кеўлимдеги гүманлардан қутылдым. Оның мени жәнеде шын сүйетуғынын түсиндим. Ол маған тосаттан қандай саўға берейин деп айтып қалды. Мен Бексултанға каналдың арғы жағасында өсип турған шырайлы гүллерди көрсеттим. Ҳәм ол аяқ кийимин шешип азғана суўды кешип өтип, сол әжайып гүллерге қарай асықты. Аяқ кийимин шешкен ўақытта қалтасынан телефоны түсип қалыпты. Сөйтип телефонына тынымсыз қоңыраўлар келе баслады. Бирақ мен телефонды усламадым. Өзи келип алар дедимде итибар бермедим. Ол маған сол гүллерди әкелип берди. Телефоным түсип қалыпты әперип жибер деди. Телефонын алғанымда, бирден “жаным” деген қоңыраў ийесине көзим түсти.



(даўамы бар)