Өзбекстан байланыс хызметкерлери республика кәсиплик аўқамы тәрепинен усы жылдың 24 июль күни Ташкент қаласындағы Байланыс тарийхы музейинде “Ең белсенди жас байланысшы”, “Ең белсенди жас программист” таңлаўы республика басқышы жеңимпажларын хошаметлеў мәресими өткерилди.

Жаслардың басламаларын қоллап-қуўатлаў, инновациялық идея ҳәм исленбелерин әмелге енгизиў мақсетинде биринши рет шөлкемлестирилген таңлаў ең белсенди жас байланысшы, ең белсенди бағдарламашы бағдарында өткерилди. Бул таңлаўдың аймақлық басқышына 60 тан аслам жаслар байланыс ҳәм информацияластырыў тараўындағы инновациялық идея ҳәм исленбелери менен қатнасқан болса, усылардың 24 жоба ийелери республика басқышында жеңимпаз болып, оларға шөлкемлестириўшилердиң дипломлары, естелик саўғалары тапсырылды.

Айтып өтилгениндей бундай таңлаўлар жас алымлардың алдағы илимий искерлигиниң раўажланыўына жәрдем береди. Соны айтып өтиў орынлы, жас байланысшы ҳәм бағдарламашылар усынған жобалардың ең ылайықларын таңлаўда идеялардың турмыслық әҳимийети, практика менен байланыслылығы, өнимдарлығы ҳәм ислеп шығыўға пайдалылық дәрежеси итибарға алынды.

Илажда сондай-ақ кәсиплеслерине өрнек болып, өнимли искерлиги менен тараў раўажланыўына ылайық үлес қосып киятырған бир топар хызметкерлерге де шөлкемлестириўшилердиң диплом ҳәм саўғалары тапсырылды.

Хошаметлеў мәресими жуўмақланғаннан соң, таңлаў қатнасыўшыларын Ташкент қаласындағы көрнекли орынларды таныстырыў мақсетинде мәдений илаж шөлкемлестирилди.





Еслетип өтемиз, таңлаўда жеңимпаз болған қатнасыўшылар Ўатанымыз ғәрессизлигиниң 23 жыллығы қарсаңында өткерилетуғын жас қәнийгелер республика форумында қатнасады.


Калмуратов Б.
megaline.uz ушын арнаўлы, Ташкент қаласынан.