Bizge belgili XXI a’sir informatsiya a’siri. Ha’zirgi waqıtta informatsiyalardı qayta islew, uzatıw, jetkerip beriw, qabıl etiw protsesslerin EEM-larısız ko’z aldımızg’a keltire almaymız. Kompyuterlerdin’ esaplaw operatsiyaları protsessor arqalı a’melge asırıladı. Protsessor logikalıq arifmetikalıq a’mellerdi orınlap, yad penen baylanısadı ha’m barlıq jergilikli qurılmalardın’ jumısın basqaradı. Demek protsessordı kompyuterdin’ ju’regi dewgede boladı. İlim texnikanın’ rawajlanıwı menen ha’zirgi ku’nde ku’ndelikli turmısımızg’a eki ha’m onnanda ko’p yadrolı protsessorlar kirip kelmekte.

Jeke kompyuter satıp alıw aldında kompyuter du’kanlarında olardın’ bahasın ha’m tu’rin sorag’anımızda "mınaw eki yadrolı, mınaw to’rt yadrolı protsessor" degen so’zlerdin’ gu’wası bolamız. Al olardın’ bir-birinen ayırmashılıg’ın bilemizbe? Ne ushın eki yadrolı yamasa to’rt yadrolı?

Jeke kompyuterlerdin’ esaplaw tezligi protsessorg’a baylanıslı. Protsessor qansha joqarı tezlikte islese, kompyuterde jumıs islew o’nimdarlıg’ıda sonshelli artadı. İnformatsiyalıq texnologiyalardın’ rawajlanıwı menen protsessorlar o’ndiriwshi bir qansha firmalar arasında protsessordın’ tezligin ku’sheytiw boyınsha ba’sekilesiwler payda boldı. Bul ba’sekilesiwde Intel firmasının’ protsessorı islew tezligi boyınsha aldıng’ı qatarg’a shıqtı.

Ha’zirgi ku’nge kelip protsessordın’ tezligin ku’sheytiw jarısı tamamlandı desekte boladı. Sebebi protsessordın’ tezligi burıng’ısınan da ku’sheygen sayın, onın’ jıllılıq bo’lip shıg’arıw quwatıda sonshelli joqarılaydı. Bul o’z gezeginde unamsız jag’daylardı tuwdırdı. Bunday mashqalanı ha’zirgi ku’nde bir korpusqa eki protsessor ornatıw arqalı sheshti ha’m bunı eki yadro dep ataydı. Yag’nıy islew tezligi burıng’ısınan eki ese ku’shli degen so’z, al bir korpusqa to’rt protsessor ornatsa da’slepkisinen to’rt ese ku’shli ha’m tez isleydi bunı to’rt yadrolı protsessor dep ataymız. Ha’zirgi waqıtta Intel ha’m AMD firmalarının’ protsessorları qollanılıp kelmekte. Intel firmasının’ eki yadrolı protsessorı Core 2 Duo, al AMD firmasıniki Dual Core dep ju’ritiledi.



B.Kalmuratov tayarladı.