Amerikalı Ralph Lauren kompaniyası du’nyada birinshi ret smart-futbolka islep shıqtı. Kompaniya xızmetkerleri endi bul aqıllı sport kiyimin satıwg’a shıg’arıw boyınsha is-ilajlar alıp barmaqta.

Smart-futbolka – sport shınıg’ıwların orınlawg’a arnalıp tigilgen texnologiyalıq o’nim. Bul futbolkanın’ AQSHtag’ı bahası 295 dollar boladı degen boljawlar bar.

Bul futbolkanın’ qanday artıqmashılıg’ı bar?

Atap o’tsek, futbolka tigilgen tawarg’a arnawlı gu’mis sımlar o’tkerilgen. Al bul sımlar o’z gezeginde, dene bulshıq etlerinin’ turaqlı qozg’alısın, ju’rek urıwı sıyaqlı adamnın’ biometriyalıq parametrlerine mag’lıwmatlardı toplaydı. Futbolkanın’ ju’rek ta’repke ornatılg’an qurılması informatsiyanı qayta islep, mobil qollanba (prilojenie) arqalı smartfong’a jiberedi.

Usı sport kiyimi OmSignal kompaniyası menen birgelikte tayarlang’an. Ha’zirshe smart futbolkanın’ tek er adamlarg’a arnalg’an u’lgisi bar. Al hayallarg’a beyimlesken variantı usı jıldın’ aqırına shekem shıg’ıwı ku’tilmekte. Futbolkanın’ mobil qollanbasın tek Apple tutınıwshıları qollana aladı.


derek ko’zi: gadgetblog saytınan.