Mana bugun tug’ilgan kunim,
Mening esa ko’zlarimda nam,
To’kilganday bolalik gulim,
Afsus, yigit bo’libman men ham.
Tug’iladi bag’ritoshligim,
Qaylardasang, ketma yoshligim?

Bosilgandek men yurgan ko’cha,
O’zgaribdi men bilgan yo’llar,
Nima topdim ulg’ayib shosha,
Asir qildi beayov yillar,
Yo’qolibdi hazilkashligim,
Qaylardasang, ketma yoshligim?

Ketolmayman burilib ortga,
Yigitlikga gullar tutarman,
Tayyormidim hali hayotga?
Ostonadan qo’rqib o’tarman.
Bekor emas dilig’ashligim,
Qaylardasang, ketma yoshligim?

Hayron bo’ldim ko’zguga qarab,
O’sha bola nigohimda yo’q,
Topmadim ham onamdan so’rab,
O’z o’tmishim o’zligimda yo’q.
Sarob tushdek o’tar cho’xligim,
Qaylardasang, ketma yoshligim?

Lablarimda ona sog’inchi,
Zahar yutdim endi ulg’ayib,
Bolalikdan to’kilgan tomchi,
Izsizgina bo’libdi g’oyib.
Faqat qoldi ko’ngli bo’shligim,
Qaylardasang, ketma yoshligim?

O’ylar edim: Shunday qolaman –
Chertganda ham bevafo umrim,
Endi bildim, yigit bo’libman –
Muhabbatga uchrashgan kunim.
Yulib oldi mendan borligim,
Qaylardasang, ketma yoshligim?

Har yoshlikning zavoli umr,
Asrab bo’lmas tutib hech birin,
Har yurakda yoshlik bari bir,
Yo’qolmasdan yashar yashirin.
Tashlab ketar chala mastligim,
Qaylardasang, ketma yoshligim?

Bola bo’lib o’sgan xonamga,
Yigit bo’lib qayta sig’madim,
Bugun bilgan zolim hayotga,
O’sha paytlar parvo qilmadim.
Kimlargadir qilgan xo’rsligim,
Qaylardasang, ketma yoshligim?

Do’stim, chiqib qaragin birrov,
Osmon uzra yoshlikga qo’l qoq,
Bizni kutar sirli bir sinov –
Hayot deya ataluvchi cho’g’.
Paymonasi to’lgan yoshligim,
Qaylardasang, ketma yoshligim?


Mamutov Marat