Ғәрезсизликтиң дәслепки жылларында-ақ, базар экономикасына тийкарланған раўажланыўдың өзине тән жолына ийе болған ҳуқуқый демократиялық мәмлекетти қурыў ҳәм пухаралық жәмийетти қәлиплестириў идеясы баслы ўазыйпа етип белгиленди.

Руўхыйлығымыз арқалы миллетимиз қәдири, абырай-даңқы тикленди. Булардың ҳәммеси мәмлекетимиз келешеги болған жас әўлад ушын Ўатан сүйиўшилик ҳәм пидайылық, елим деп, журтым деп жанып жасаўдың, миллет келешеги ушын қайғырыўдың белгиси есапланады.

Әсиресе, келешегимиз болған жаслардың руўхый дүньясын байытыў, әсирлер бойы бабаларымыздан мийрас болып киятырған руўхый қәдириятларымызға садық әўлад болып жетилисиўи мақсетинде барлық билимлендириў мәкемелеринде «Руўхыйлық тийкарлары» сабақлығы енгизилди. «Руўхыйлық тийкарлары» ҳәм «Тарийх» пәни арқалы дәслеп руўхый мийрасымыз, мәдений қәдириятларымыз, тарийхый естеликлеримиз, илим-билим, әдебият, көркем-өнер, халық аўыз еки фольклоры, мәҳәлле, шаңарақ булардың ҳәммеси руўхыйлық екенлигин терең түсинип, тарийхымызды терең билип аламыз. Себеби, ҳәр бир халықты биз оның руўхыйлығы ҳәм тарийхы аркалы билемиз.

Руўхыйлығымыз тиккелей билим-тәрбия менен байланыслы. Халқымыздың ертеңги күни қандай болыўы, перзентлеримиздиң бүгин қандай билим-тәрбия алыўына байланыслы. Бүгинги күнде айрым оқыў орынларында руўхый ағартыўшылық ислери қанаатландырарлы жағдайда емес екенлиги себепли айрым жасларымыз жаратылып атырған кең имканиятлардан нәтийжели пайдаланыў орнына, жаман иллетлерге араласып атырғаны, әлбетте ашынарлы жағдай.

Билим менен бирге руўхыйлық-ағартыўшылық ислерин кең түрде бирге алып барып, жасларымызды ўатанға садық, кәмил инсан етип тәрбиялаўға тек ата-ана, устаз жуўапкер болып қалмай, кең жәмийетшиликте жоқарыдағыдай ўазыйпаларды турмысқа асырыўға пидайылық пенен қатнасса, жасларымыздың келешеги улы болары сөзсиз.


М.Чимбергенова.

ҚР МСБ Баспасөз хызмети бас
қәнигеси-басқарма баслығының
баспасөз хаткери.