Өзбекистан Республикасы Мәмлекетлик салық комитети тәрепинен салық билимданлығы ҳәм нызамлылығы бойынша балалар көз-қарасында дәслепки көнликпелерди пайда етип барыў мақсетинде дәстүрий түрде өткерилип киятырған «Салық билимлери – балаларға» дөретиўшилик көрик таңлаўының жуўмақлаўшы басқышы болып өтти.

Бундай ис-илажлардың алып барылыўы жас әўладтың ҳәр тәреплеме бәркамал, өз ҳукуқ ҳәм миннетлемелерин билетуғын, социаллық жедел болып рагажланыўында үлкен әҳмийетке ийе.

Пухараларымызда салық мәдениятын қәлиплестириў ең әҳмийетли мәселелерден бири болып, бул мәденият мектеп парталарынан тәрбияланып барылыўы керек екенлигин турмысымыздың өзи дәлиллемекте.

Мәмлекетлик салық комитети, Жоқары ҳәм Орта арнаўлы билимлендириў, Халық билимлендириў министрликлери менен биргеликте мектеп, академиялық лицей, кәсип-өнер колледжлери ҳәмде жоқары оқыў орынларының экономикалық болмаған бағдарларында салық билимлерин бериў бойынша да арнаўлы оқыў бағдарлармалары ислеп шығылғанлыцы өз нәтийжелерин көрсетпекте.

Бир неше жыллардан берли өткерилиўи дәстүрге айланған «Салық билимлери – балаларға» дөретиўшилик көрик таңлаўының район ҳәм қалалық басқышлары жеңимпазлары Қарақалпақстан Республикасы басқышында өз күшлерин сынап көрди. Бунда биринши орынларды қолға киргизген қатнасыўшылар Ташкент қаласында болып өткен жуўмақлаўшы басқышқа да қатнасып қайтты.

Ташкент қаласында болып өткен жуўмақлаўшы басқышта бир неше жерлеслеримиздиң сыйлы орынларды алғаны Қарақалпақстан Республикасындағы оқыў орынларында да бул бағдардағы билим ҳәм түсиниклердиң берилип барыўы жоқары дәрежеде екенлигин көрсетеди.

“Салықлар нелерге төленеди ҳәм нелерге сарпланады?” темасындағы ең жақсы компьютер презентациясы номинациясы бойынша 1-орында Нөкис қаласындағы НМПИ жанындағы Академиялық лицейдиң II-басқыш оқыўшысы Ҳүрлиман Алламуратова, “Өзбекситан Республикасында салық сиясаты” темасындацы ең жаксы шығарма номинациясы бойынша 3-орынды Ташкент Педиатерия медицина институты Нөкис филиалы жанындағы академиялық лицейдиң I-басқыш оқыўшысы Айжамал Карматдинова, “Салық темасының гүрриңлерде сәўлелендирилиўи” номинациясы бойынша Нөкис қаласы 27-санлы орта мектептиң 7-А класс оқыўшысы Дильноза Амниязова ҳәм “Салық темасының сүўретлердеги көриниси” номинациясы бойынша Нөкис қаласы 6-санлы орта мектептиң 3-класс оқыўшысы Назлымхан Таскинова хошаметлеўши сыйлықты жеңип алып шөлкемлестириўшилер тәрепинен диплом ҳәм де қымбат баҳалы саўғалар менен сыйлықланды.


М.Чимбергенова.
ҚР МСБ Баспасөз хызмети бас
қәнигеси-басқарма баслығының
баспасөз хаткери.