Спорт қәнигелериниң атап өтиўине қарағанда, «хоккей» атамасының келип шығыўында еки түрли көз-қарас бар екен. Оның бири британия дәреги. Олар «хоккей» сөзиниң тийкарын «хауки» ямаса «хоки» сөзи менен байланыстырады. Орта әсирлерде дақылларды жыйнап алыў байрамы усылайынша аталады екен. Байрам ўақытында дийқанлар басы иймек таяқты алып, кишкене топты қуўалап ойнаған. Ал, канадалылар «хоккей» сөзиниң келип шығыўына еки түрли түсиник береди.

Бириншисинде, «хоккей» сөзи Канадада қоныс басқан мохауклар руўынан келип шыққанын атап өтеди. Ески дәўирлерде мохауклар шөпте таяқ пенен топты қуўып жүрип ойнайтуғын ойынды «хогий» деп атаған. Канадалылардың және бир түсиниги, «хоккей» сөзи шопанның таяғының атамасы менен байланыслы деп көрсетеди. Атап өтиў керек, канадалы шопанлар қойды қайтаратуғын таяқты басы ийилген «хокэ» деп айтады екен.