Усы жылдың 29-апрел сәнесинде Нөкис қаласында Ўатанымыз ғәрессизлигиниң 25 жыллығы ҳәм Саламат ана ҳәм бала жылына арналып “Өзбекистан улыўма үйимиз” дослық ҳәм мәденият фестивалы болып өтти.

Қарақалпақстан Республикасында 50 ден артық миллет ҳәм елат ўәкиллери өз-ара аўызбиршиликли ҳәм татыў жасап, әмелге асырылып атырған кең көлемли реформалар, үлкен дөретиўшилик жумысларда белсенди түрде қатнаспақта.

- Мәмлекетимизде барлық миллетлердиң өз тили, мәденияты ҳәм үрип-әдетлерин раўажландырыў ушын кең имканиятлар жаратылған, - дейди Бердақ атындағы Қарақалпақ мәмлекетлик университети 4-курс студенти Анастасия Ботова.

Иләж шеңберинде “Миллий ҳәм диний татыўлық – турақлылық факторы”, “Қүдиретимиз – бирлик ҳәм аўызбиршиликте” темаларында илимий-әмелий семинар ҳәмде “Биз сениң перзентлериңбиз, Өзбекистан!”, “Саламат ана, саламат бала – миллет бахты” атамасындағы көргизбе шөлкемлестирилди. Бунда түрли миллетлер мәденият ҳәм көркем өнер үлгилери, өнерментлик буйымлары, миллий кийимлер көпшилик нәзерине усынылды.

Қарақалпақстан Республикасында искерлик алып барып атырған түркмен, қазақ, рус, украйн, корейс, миллий мәденият орайлары қасындағы көркем ҳәўескерлик жәмәәтлериниң ғәрессизлик, тынышлық, дослық ҳәм меҳир-ақыбетти өзинде сәўлелендирген сазлы қосықлар айтылды. Иләж умытылмас ўақыяларға толы ҳәм мазмунлы болып өтти.


Дерек көзи: ӨзА.