Apple kompaniyası o’zinin’ o’nimlerin qatan’ qupıya saqlamaqta. O’tken jılda hesh kim besinshi IPhone nın’ qanday bolıwın ko’z aldına keltire almas edi.

Jıl ayag’ına jaqın, onı ko’rgizbe retinde prezentatsiyası bolıp o’tti. Solay etip, bul kompaniyanın’ besinshi o’nimi iPhone 4 ten sırtqı ko’rinisi jag’ınan derlik parıq etpeydi. Tek g’ana tezlik ha’mde islew ta’rtibinde ayırmashılıqlar bar.

Bul o’nimnin’ sırtqı ko’rinisinen kelip shıqqan ko’z qaraslarg’a qarag’anda ekspertler iPhone 5 usı jıldın’ jaz yaki gu’z ma’wsimlerinde o’zgeshe ko’riniste ha’m ja’nede ken’irek ekranda shıg’arılıwın boljamaqta. Usı o’nimnin’ ıqlasbentleri iPhone 4 ti yarım jıl ku’tkenin esapqa alsaq, iPhone 5 ti ja’nede ko’birek ku’tiwge tuwrı keliwi mu’mkin. Basqa ta’repten ba’sekilesler qol quwsırıp otırg’an joq. Sonlıqtan jan’a o’nimdi jaz aylarında satıwg’a shıg’arıw tabıslı boladı.

Jıl aqırına kelip iPhone 5 qatarına –u’shinshi a’wlad iPad ta qosılıwı mu’mkinligin boljamaqta. Usı qurılma joqarı ko’lemdegi display menen ta’miyinleniwi mu’mkin. Sonday-aq sapalı kamera, jan’a portlardı qollap quwatlaw, ja’nede juqa ha’m jen’il korpus penen ta’miyinleniwin aytpaqta. Aytpaqshı, bul jan’alıqtan xabardar Samsung o’z ba’sekilesinen aldınıraq jan’a planshetin satıwg’a shıg’arıw na’tiyjesinde. Samsung sonday-aq 11,6 dyumli Android 4.0 bazasında isleytug’ın joqarı tınıqlıqtag’ı displey ornatılg’an planshetti jıl basınan aq paydalanıwshılarg’a usınıwdı rejelestirgen edi.