Ҳар бир инсон яхши яшаб равон турмуш кечиришни хоҳлайди. Кўпчилигимиз бундай ҳаётга ҳалол меҳнатимиз, эзгу ишларимиз орқали эришсак, айрим одамлар қинғир йўлни танлаб бойлик ва ҳокимиятга интилади. Бу йўлда улар ўзининг бор ёвуз имкониятларини ишга солиб бегуноҳ, ёш ва ғўр инсонлардан фойдаланади. Кўзлагандаям жуда баланд чўққини кўзлаб, мақсадига эришмагунча тиниб-тинчимайди. Дунё ўзи эзгулик ва ёвузликдан бир сўз билан айтганда оқ ва қорадан иборат. Ана шу икки эгизак рангни ажрата олиш эса давр талабига айланди. Бугуннинг энг хавотирли вазиятига айланган, бутун дунёга тобора кундан-кун ёвузликлари орқали мусулмон дунёсига, ислом динига нисбатан нафрат уйғотаётиб, ўзларини Ислом давлати дея атаётган террорчилик ташкилоти ҳам фақат бойликни мақсад қилиб, қора рангли байроқлари билан тинчлигимизга рахна солмоқда.

Энг ачинарлиси уларнинг нафси йўлида, тенгдошларимизнинг гулдек ҳаётлари поён топаётганлигидир.

Мана 7 йилдан ошдики, бу ёвуз кимсалар дунёнинг турли нуқталарида қанчадан-қанча портлашлар, қуролли тўқнашувлар содир қилиб, Оллоҳ томонидан яратилган энг буюк мўжиза инсон ҳаётига дахл қилмоқда.

Юртбошимиз таъбири билан айтганда Бугунги кунда дунёнинг турли минтақаларида авж олаётган қарама-қаршилик, жумладан, Яқин Шарқда, Ироқ ва Сурия мамлакатларида бўлаётган қонли тўқнашувлар, мусулмон дунёсидаги турли мазхаб ва оқимлар ўртасида кучайиб бораётган ўзаро низо ва зиддиятлар бегунох одамларнинг қурбон бўлаётгани барчамизни ташвиш ва хавотирга солмасдан қўймайди.

Шу боисдан ёшларимизни билимли, маънан етук қилиб тарбиялаш орқали кимларнингдир нафси йўлида қурбон бўлишини олдини олиш, уларни жаҳолатга қарши курашиш руҳида тарбиялашни бош вазифалардан бири сифатида белгилаб олинди. Бу борада барча тегишли ташкилотлар, ўқув муассасалари билан, маҳаллалар билан ҳамкорликда режа бўйича бир қатор тадбирларни амалга ошириб келмоқда.

Жумладан, шу йилнинг феврал ойида Айдарбек Тулеповнинг «ИШИД фитнаси» китоби тақдимоти бўлиб ўтди. Тадбирда Қорақалпоғистон Республикаси Вазирлар Кенгаши Раиси ўринбосари М.Алеуов, ҳамон дунёнинг айрим ҳудудларида қонли тўқнашувлар, тўс-тўполонлар содир бўлаётганлигини, айниқса, Ироқ ва Суриядаги динимиз душманлари қўлида қўғирчоқ бўлаётган бир тўда террорчилар томонидан қилинаётган қўпорувчиликлар, қатлиомлар ва босқинчиликлар ҳар қандай кишининг қалбини ларзага соладиганлиги, Ўзбекистон мусулмонлари идораси раиси ўринбосари, исломшунос олим Айдарбек Тулеповнинг “ИШИД фитнаси” номли янги китоби айнан шу мавзуга бағишланганлигини, ушбу китобда дунё жамоатчилигининг диққат марказида турган ва оммавий ахборот воситаларидаги баҳс-мунозараларга сабаб бўлаётган “Ироқ ва Шом ислом давлати” (ИШИД) террорчилар тўдасининг фитналари фош этилгани, Мазкур китобда ИШИД террорчилар тўдаси Исломни ниқоб қилиб учинчи томоннинг буюртмасини бажараётгани, бошқарувни қўлга олишга уринаётгани, бойлик орттиришни кўзлаётгани аниқ мисоллар билан очиб берилганлиги ҳақида айтиб ўтди.

Шунингдек, ғаламисларнинг мусулмонларни кофирга чиқариб, зулм қилаётгани, тинч аҳолига азоб бераётгани ва бошқа барча хатти-ҳаракатлари, даъволари Ислом дини моҳиятига буткул зид экани ҳужжат-далиллар асосида исботланганлиги ҳақида таъкидлаб ўтди.

Тошкент Ислом институти ўқитувчиси Жалолиддин Хамрақулов бугунги кунда бутун дунё халқлари тинчлигига раҳна, одамларнинг қалбларига қўрқув, ғулғула солаётган, кимларнидир жигарпорасидан, кимларнидир эса меҳрибон ота-онасидан айираётган, оила деб аталмиш кичик жамиятни пароканда қилаётган ёвуз куч бу – шубҳасиз ИШИД яъни “Ироқ ва Шом ислом давлати” деб ном олган террорчи ташкилот эканлиги, бу террорчи ташкилот ҳаракатлари биздан узоқ деб бепарво бўлиш бугунги кунда ҳеч бир кишига лойиқ иш эмаслиги, шу боис ҳам Президентимиз халқимизни ИШИД каби тажовузкор фирқалар ёмонлигидан сақлашга қаратилган ғояларни олға сураётганлиги, ушбу китобда ислом душманларининг асл башаралари ёрқин мисоллар билан очиб берилгани, жумладан, ғаламисларнинг ҳар бир қинғир қилмишлари Қуръони карим оятлари, ҳадиси шарифлар ҳамда етук ҳанафий олимларининг фатволарига таяниб раддиялар берилгани китобни янада аҳамияти ва долзарблигини оширганини айтиб ўтди.

Сўнг Тўхтобой жоме масжиди имом-хатиби Исоқжон Бегматов “ИШИД фитнаси” номли китоб халқимизни огоҳликка чақириш йўлида қилинган саъй ҳаракатларнинг ёрқин меваси десак хато қилмаган бўламиз. Ушбу китобда ИШИД нинг Исломга тааллуқи йўқ экани, уларнинг ботил даъволари, улардан сақланиш чоралари, баён қилиниши билан бир қаторда улар сабабли азоб-уқубатларга, хўрликларга дучор бўлган кишилар қисмати акс эттирилганлиги, ИШИД аъзолари эса инсонларга нисбатан қилаётган жиноятлари: эр-хотин одида фарзандларини, ёш норасида гўдаклар кўз ўнгида ота-онасини ўлдириши, бир вақтлар илм-фан маркази, авлиёлар, олимлар сарчашмаси бўлган Бағдод каби шаҳарлар улар туфайли вайронага айланганлиги, Аллоҳ таоло дўстларининг қадамлари ва қабрлари билан тўла тупроқ бугун бегуноҳлар қони билан белангани уларнинг ҳаракатлари динимиз буйруқларига зид экани, шунингдек У сўзини якунлар экан, ушбу китобни хар бир инсон, хусусан, Республикамиздаги барча талаба ёшлар ўқиб ўрганишлари лозимлигини қайта-қайта такрорлаб ўтди.

Агар кимдир ИШИД ҳақида тўлиқ ва тўғри маълумотга эга бўлишни хоҳласа, ушбу китоб унга муносиб манба бўла олади деб бемалол айта оламиз.


М.Рахимбоева.
ҚДУ талабаси.