Забардаст тоғларга салом бермасам,
Юз тулпор югурган йўлим тор менинг.
Шашти зўр Жайҳуннинг тўлқинидан ҳам
Қора қалпоқ кийган xалқим бор менинг.

Кенг дала яйлови кўнглига кўзгу,
Қўй-у йилқидан кўп нияти эзгу,
Мен ғариб болангнинг бойлиги сўз-ку,
Сўзни шундоқ суйган xалқим бор менинг.

Қизиқчи, лаққилар ёнида жамсиз,
Ёшлик айвонига кириб шу дам сиз,
Куртигин емасдан кетармикансиз,
Кулсанг, ўртоқ деган халқим бор менинг.

Мардликда сиғмайди бир чопонига,
Савкеледа сулув келса ёнига.
Софлик ҳиди урилган забонига,
Дилни байроқ қилган xалқим бор менинг.

Ёниб севаман-да,ёниб севаман,
Қумзарралар ичра яшнаган чаман.
Фарҳоддай Оролга йўллар очаман,
Йўллари оқ юрган xалқим бор менинг.

Асрлар қаъридан тортса наъралар,
Йиллар бешигида Ватан аллалар,
Не ўтмишдан ўтди ўктам қалъалар,
Руҳи уйғок бўлган xалқим бор менинг.

Кўҳна қалъалардан эсиб турган ел,
Буюк зотлар руҳи кезиб юрган ер,
Тошни гул, даштни ҳам бўстон қилган эл,
Қанча фахрлансам ҳақим бор менинг,
Олижаноб, бардам халқим бор менинг.

Балиқбўй диёрим,тенгсиз диёрим,
Қўбиз ноласидан яралган борим,
Юракда ягонам,кўксимда орим,
Қорақалпоқ деган xалқим бор менинг!


Аббос Раҳим. Элликқалъа, Бўстон.