Жақыннан баслап Қарақалпақстан телеканалында жаңа көрсетиў көпшилик нәзерине усынылады. Бул ҳаққында Қарақалпақстан телеканалында ҳәм социяллық тармақларда анонс етилмекте. Дүньядағы көплеген мәмлекетлердиң теле эфирлерде көрсетилип атырған бул шоу бағдарлама ҳаққында пикирлессек.

Хабарларға қарағанда телешоўдың аты “Ҳәзилкеш” атамасы менен аталған. Ал бағдарламаны “Юморбек” аты менен аталған қызықшы алып барады. Көрсетиўдиң биринши санына қосықшы Байрам Пердебаев қатнасады. Бул ҳаққында социяллық тармақларда жәрияланбақта.

Социяллық тармақ пайдаланыўшыларының көпшилиги бул көрсетиўге қызығыўшылық пенен қарамақта. Тармақ пайдаланыўшыларының пикиринше сырт елли теле көрсетиўдиң көширмеси, бирақ ҳәзиллери қарақалпақша.

Еслетип өтемиз, усы форматтағы теле-шоў көрсетиў көплеген сырт елли мәмлекетлерде көрсетиледи. АҚШта “The Tonight Show Starring Jimmy Fallon” аты менен аталған болса, Россияда “Вечерный Ургант ” аты менен искерлик көрсетпекте, ал Қазақстанда болса “Түнги студияда Нурлан Қоянбаев” аты менен эфирге берилмекте. Мине енди сырт ел форматындағы телешоў Қарақалпақстанғада жетип келди.



Көрсетиўдиң биринши саны усы жылдың 13-феврал күни, саат 19:40 та Қарақалпақстан телеканалында көрсетиледи. Көрсетиў қай дәрежеде алып барылады, турақлы ықласбентине ийе көрсетиў бола алама яки басқада сораўлардың жуўабын алдағы ўақытта билетин шығармыз.


Сүўрет: facebook сайтынан.