Mobil telefonnın’ payda bolıwı adamzattın’ son’g’ı yarım a’sirde erisken en’ u’lken jetiskenliklerinin’ biri. Bul qurılma turmısımızg’a tez pa’t penen enip, tez rawajlanbaqta. Bu’gin biz sizlerge usı qurılma haqqında qızıqlı dereklerdi usınamız.

— 1 —
“Smartfon” terminin birinshi ret 2000 jılı Ericsson kompaniyası Ericsson R380s telefonının’ reklamasında qollang’an. Qurılma Symbian OS v5.1 basqarıwında jumıs islep, ashılıp jabılatug’ın qaqpag’ı bar monoxrom sensor ekranı bolg’an.

— 2 —
Uyalı telefondı ılaqtırıw – Finlyandiya, Belgiya ha’m basqa ayırım ma’mleketlerde ken’nen en jayg’an sport tu’ri bolıp tabıladı. 2014 jılı o’tkerilgen na’wbettegi ja’ha’n chempionatında usı sport tu’rinen ja’ha’n rekordı jan’artıldı – 110,42 metr.

— 3 —
Uyalı telefondı joytıp alaman dep yaki baylanıstan u’zilemen dep qorqıw nomofobiya dep ataladı. Bul termin 2010 jılı paydalanıwshılardın’ uyalı baylanısqa tiyisli a’detlerine arnalg’an izertlewlerde payda boldı. Sorawnamag’a qatnasqanlardın’ yarımınan aslamı uyalı telefonın joytsa, quwatı tawsıla baslasa yaki balansta qa’rejeti joq bolsa, baylanıs shen’berine shıqpay tursa uwayımlaytug’ının ta’n alg’an.

— 4 —
Du’nyadag’ı en’ tabıslı telefon Nokia 1101. Ol 2003 jılı shıqqan waqıttan baslap onın’ 250 million danası satılg’an. Bul uyalı telefonlar arasında g’ana emes, al ulıwma elektron gadjetler ishinde de rekord bolıp esaplanadı. Ha’zirgi waqıtta bul model islep shıg’arılmaydı.

— 5 —
SMS kelgen waqıtta Nokia telefonlarınan shıg’atug’ın standartlı gudok, “sms” degen ma’nisti beretug’ın Morze kodı bolıp tabıladı.