Nokia kompaniyası son’g’ı jılları uyalı telefonlar islep shıg’arıw boyınsha to’menlep ketken edi. Ha’tte ayırım analizshiler bul markanın’ da’wiri tamamlandı dep boljag’an da edi. Degen menen ha’zirgi waqıtta uyalı telefon salasında en’ sapalı marka usı Nokia telefonları. Onın’ o’ndirisinin’ to’menlewine iPhone ha’m Samsung telefonlarının’ ku’shli ba’sekelesiwi sebep boldı.

Biraq, Nokia markasınan u’mit u’zbegen tutınıwshılar ushın aldımızda tag’ı ko’plegen jan’alıqlar bar. O’tken jazda bul kompaniya Lumia tipli telefondı satıwg’a shıg’arg’an edi. Jaqın arada usı tipli telefonnın’ belgisi retinde Nokia EOS telefonın satıwg’a shıg’armaqshı.

Bul telefonnın’ en’ tiykarg’ı ayırmashılıg’ı – ju’da’ joqarı da’rejede su’wretke tu’siriw qurılması bolıp tabıladı, yag’nıy, burın bolmag’an 41 MP. Budan basqa sapa ma’seleside en’ baslı orında. Bunı aldıng’ı Lumia920 telefonının’ rawajlang’an nusqası dep aytıwg’ada boladı.

Jaqında kompaniya wa’killeri jurnalistler menen sa’wbetinde endigiden bılay ha’r tu’rli planshetlerdi de ja’riyalaytug’ınlıg’ı aytılg’an.

Finlyandiya radio-televiziya ma’kemesi jaqında Nokia kompaniyasının’ en’ jan’a ekonomikalıq hal-awhalın ja’riyalag’an edi. Biraz jıllardan berli bankrot bolıwına sa’l qalg’an kompaniyanın’ 2012 jıldın’ son’g’ı mezgilinde ekonomikalıq paydası 440 million evro bolg’an. Al 2011 jılı bul sandı kerisinshe 954 million evrog’a to’menlegen edi. 2011 jıl bul kompaniya ushın en’ unamsız jıl bolıp, jalpı o’nim qunı 10 milliard evrodan 8 milliard evrog’a to’menlep ketken edi.

Demek, 2012 jıldın’ son’ınan baslap ataqlı kompaniya to’menlewden o’siwge qaray jıljıdı degen so’z. Aldımızda ele ja’riyalanbag’an qanshama texnikalıq qurılmalar bar. Nokia kompaniyası ushın pu’tkil du’nya tutınıwshılarının’ isenimin aqlaw usı 2013 jılda belgili boladı.


su’wret ha’m derek ko’zi: thenokiablog.com