Мен ушын қайғырып, қуўансам күлип,
Сиз бенен жүрермен бахытқа толып,
Мениң ең исенген инсаным болып,
Аман-саў жүргейсиз бәрҳә, әкежан!

Мен сизиң ерке бир жалғыз қызыңыз,
Саўапқа бөленсин басқан изиңиз,
Еки қылмайман сизиң айтқан сөзиңиз,
Аман-саў жүргейсиз бәрҳә, әкежан!

Мен-бир нәлше, сиз-қарыўлы бағманым,
Бағыңызда мениң камал таўғаным,
Қуўансаңыз мен шадлыққа толғаным,
Аман-саў жүргейсиз бәрҳә, әкежан!

Өз күшиңиз бенен бахыт тапқансыз,
Дос-душпанға бирдей күлип баққансыз,
Бәрҳа саўап дәрьясында аққансыз,
Аман-саў жүргейсиз бәрҳә, әкежан!

Тәрбиялап, өсирдиңиз мени жастан,
Кеўилиңиз кеўиллерге нур уласқан,
Өз мийнети менен алға қәдем басқан,
Аман-саў жүргейсиз бәрҳә, әкежан!

Өмир сынаўларын артта қалдырып,
Шаңарағымыздың бахыт отын жандырып,
Бизди мудам меҳриңизге қандырып,
Аман-саў жүргейсиз бәрҳә, әкежан!

Өмириңизде болса егер, қыйыншылық,
Қыйын күнлер жолыңыздан қалсын шығып,
Сынаўларды мийнетиңиз бенен жығып,
Аман-саў жүргейсиз бәрҳә, әкежан!

Жаным пидә болсын басқан изиңизге,
Жас толмасын, ҳешқашан нурлы көзиңизге,
Маржан пицин нәсиятлы сөзиңизге,
Аман-саў жүргейсиз бәрҳә, әкежан!

Анажаным менен узақ өмир сүриң,
Бул дүньяның шадлықларын бирге көриң,
Аман-саў жүргейсиз бәрҳә, әкежан!
Анам менен сиз бәрҳама шадлы жүриң!


Бийбисара Худайназарова.