Men o’zge a’lemde ju’rgendeymen-aw,
O’mir go’zzallıg’ın bilgendeymen-aw,
Du’nyag’a tap ha’zir kelgendeymen-aw,
Gu’zde sulıw ko’rinesen’ Kegeyli.

Sansız tereklerin’ turar shayqalıp,
Alıstan altınday ko’zge taslanıp,
Samalda sıtırlap qosıg’ın aytıp,
Gu’zde sulıw ko’rinesen’ Kegeyli.

Ayqulaq tawlanar tan’ shug’lasında,
Go’zzal tu’sin berip hu’r aspanın’a,
Ashıq boldım senin’ gu’l jamalın’a,
Gu’zde sulıw ko’rinesen’ Kegeyli.

Shırayın’dı ashıptı gu’z boyawları,
Qushag’ın’ altıng’a tolıp turg’anday,
İlham alıp keldi gu’z qıyalları,
Qosıq jawın bolıp quyıp turg’anday.

Ushıp ketsedag’ı jıllı jaqlarg’a,
Men sıyaqlı seni qıymaydı quslar.
Olardın’ xosh aytıp sayrawlarında,
Senin’ miyrimin’ bar, menin’ mun’ım bar.

Nama shalg’anında gu’z ırg’aqları,
Tırnalar sap tartıp qosar hawazın.
Kewlimdey sarg’ayar gu’z japıraqları,
Men sende an’ladım gu’z mag’anasın.

Ras, burın bilmeppen gu’z go’zzallıg’ın,
Ko’rmeppen bunın’day altın sawlatın,
Sen ashıp ko’rsettin’ gu’z ka’ra’matın,
Gu’zdin’ sa’ni bolıp tursan’ Kegeyli.

Ku’nler suwıtsa da ıssı kelbetin’,
Jılıtar kewlimdi quyashtay bolıp,
Sen yadımda qalasan’ sulıw Kegeylim,
Su’wretshinin’ sızg’an su’wreti bolıp.


Ja’rimbetova Maryam