Tumaristin’ qarnınan,
Tuwılıpsan’ jan bolıp.
Shıraqlardın’ murnınan,
Atlıg’ıpsan’ qan bolıp.
Bas salıng’an mesin’de,
Kir qanına juwıldın’.
Dara kelgen gezin’de,
Hiyle menen qutıldın’.
Tulpar bag’ıp sho’lin’de,
Taylaq penen tuwıldın’.
Zorlıq penen elin’de,
Su’rginlerge quwıldın’.
Tır jalan’ash qalsan’ da,
Qalpag’ın’dı saqladın’.
Ormanbet biy tusında,
Bar ku’shin’di taqladın’.
Birin buzıp, du’zetip,
Haqıyqatlıqtı jaqladın’.
A’dillikti so’z etip,
Patshalarg’a jaqpadın’.
Xannın’ tilin gu’n’ etken,
Asanın’a quwandın’.
Millet tan’ın gu’zetip,
Tu’rkiy menen oyandın’.
Yassawiyden so’z alıp,
Yugnakiyin’ uzattı.
“Qalpaq” degen bir atın’,
Jamanlıqtı qulattı.
Sheshenlerin’ so’z quwıp,
Asırap qaldi elattı.
Qoltıg’ın’da bir nanın’,
Ne bir eldi jubattı.
Uwızın’da bir tamshı,
Sol tamshıdan na’r aldı.
Basıp o’ter izin’nen,
Palwanların’ jaraldı.
Jiyrensheden u’yrenip,
Ko’p sheshenler sıy aldı.
Alpamısın’ qayda dep,
Neshshe palwan jıynaldı.
Biri ketse, biri su’yep,
At izinen tay aldı.
Gu’reskende barmag’ın’a,
Ku’shi jetpey qıynaldı.
Biraq geyde aldanıp,
O’z elin’de jag’ıldın’.
O’z pa’sin’e bas iymey,
O’lip g’ana bag’ındın’.
Jiyen babam izinen,
Qaylarg’adur jol tarttın’.
Bir kiyizge on’ısıp,
Qumlıg’ın’da ko’p jattın’.
Xorezmde jıyılıp,
Aral boyın jayladın’.
Bizge pana bolsın dep,
Maman biydi sayladın’.
Abat bolıp sahrada,
Duwtar menen oynadın’.
Qasın’ sumlıq bolsa da,
Sadalıqtı qoymadın’.
Xalqın’ menen bir bolıp,
Ko’p mu’shkilge jolıqtın’.
Aydos penen at shawıp,
Batır xandı qorqıttın’.
Ernazardın’ jen’inde,
Ko’p palwandı sulayttın’.
Basın sıypap jarlının’,
Jaman baydı mun’ayttın’.
Kimligin’di umıtıp,
Berdaq penen oyandın’.
Bir zorlıqtan qutılıp,
Basqa zorlıq sorandın’.
Orıs penen jasap ta,
Qalpag’ın’dı saqladın’,
Ko’klen menen talasıp,
Orısqa da jaqpadın’.
Shayırların’ ketkende,
Ibrayim dep shaqırdın’.
O’zbek izin quwalap,
Azatpan dep baqırdın’.
Endi shette mun’ayıp,
Ko’p izinde qalmaysan’.
Du’nya jutıp ketse de,
Qalpag’ın’da jasaysan’.


Mamutov Marat