"Siz sevgan qahramonlar” mavzusidagi uchrashuv kechasi ko’tarinki kayfiyatda bo'lib o'tdi. Zebo Mirzayeva birinchi bo’lib so’zga chiqib, qoraqalpoq xalqiga bag’ishlangan she’ri bilan yig’ilganlarni hushnud etdi. Keyin aktyor Yigitali Mamajanov qoraqalpoq xalqiga samimiy so’zlarini bildirdi va "Bugun sizlar bilan qalban yaqinlashgani keldik”, deya ta’kidladi.

Estrada qo’shiqchisi Tohir Usmonov o’z so’zida festivalda viloyatlarga boradigan san'atkorlardan guruhlar tashkil qilishayotganlarida "Qoraqalpog’iston Respublikasiga kim boradi?”, deganlarida "Men boraman!" deb chiqganligini aytdi.

Yoshlar orasida "Nima uchun estrada xonanadalari milliy liboslarda chiqmaydi”, degan savolga Tohir Usmonov ham, Yigitali Mamanajonov ham "Kelajakda milliy liboslarda chiqamiz”, deya so’z berishdi!

Yosh qo’shiqchi Dilso’z esa onasining qoraqalpoq elida tug’ilib o’sganligini aytdi.

Kecha yoshlar tomonidan beriladigan savol-javoblar bilan davom etdi. Savollarga ko’ra Tohir Usmonov "Imkoni bo’lsa, albatta qoraqalpoq tilida ham qo’shiq kuylayman”, deya ta’kidladi.

Mehmonlar qoraqalpoq yoshlarining samimiyligini, ushbu samimiyligini hechqachon yo’qotmasligini tilak bildirdi. Tadbir so’ngida musiqiy tanaffus barchani raqsga chorladi.

Tohir Usmonov, Shoira Otabekova ijrosidagi qo’shiqlar butun qoraqalpoq yoshlarining ko’tarinki kayfiyatini yanada yuqorilatdi. Ayjamal Joldasbayeva kecha qahramonlariga kelasi yilgi tashrifida qoraqalpoq milliy liboslarini qoraqalpoq qizlari o’z qo’llari bilan kashtalab, sovg’a qilishini aytishdi.

Uchrashuv kechasi so’ngida eng yaxshi savol egalari ijodkorlar tarafidan rag’batlantirildi. Ijod kechasi yoshlar qalbidagi olam-olam taassurotlar bilan yakunlandi.


Gulzada O’teniyazova,
Bekbosin Kalmuratov,
Malika Bishekova

Manba: Kamolot.uz