Рио-де-Жанейродағы Мария Ленк атындағы Олимпиада жүзиў орайында күтпеген ўақыя жүз берди. Белгисиз себеплер менен бассейнлердиң бириндеги суў ашық-жасыл реңге өзгерди.

Сийшемби күни еркеклер арасында 10 метр бийикликтен суўға секириўден финал жарысы өткерилди. Сол ўақытта суў көк реңде болған. Ертеңине тап усы бассейнде ҳаял-қызлар арасында жарыс өткерилди.Усы жарыста олар жасыл реңдеги бассейнге суўға түсиўине туўра келген.

Бир күнниң ишинде суў реңиниң не себепли өзгергенин жарыс шөлкемлестириўшилери түсиндире алмады. Олардың айтыўы бойынша суў тексериўден өткерилген.

- “Ҳеш қашан бундай суўға секирип көрмеген едим”, – деди жарыс қатнасыўшысы британиялы спортшы Тоня Коуч.

Ал социяллық тармақларда “бассейнге Шрек шомылып шыққан шығар” деген ҳәзил сөзлер тарқалып кетти. Бир қызығы, кейинги (қасындағы) бассейнниң суўы өзгермеген.

Халықаралық жүзиў федерациясының жәмийет пенен байланыс ўәкили Педро Адреганың болжамына қарағанда “бассейинниң бетине түсетуғын күн нурының тәсирин төменлетиў ушын жарыс қатнасыўшылары суўдың реңин өзгертиўди сораған болыўы мүмкин” – деди.

Бундай жағдай, спортшылардың ден саўлықлары менен жарыс нәтийжелерине кери тәсир етпеген.

“Рио-2016 Олимпиадасының қатнасыўшылары менен тамашагөйлери жарыстың қәтесиз шөлкемлестирилгенине исенимли болыўы керек. Бул жүдә зәрүр. Биз жүз берген жағдайдың себеплерин анықлаў жумысларын даўам еттиремиз”, -деп шөлкемлестириўшилер мәлимлеген.