Sony korporatsiyası 1946 jılı Yaponiyada du’zilgen. Og’an Tokio janındag’ı Minato qalasında tiykar salıng’an. Sony Corparation turmısta paydalanatug’ın elektro-o’nimler ha’m elektronikalıq joqarı texnologiyag’a iye o’nimlerdi islep shıg’arıw menen shug’ıllanadı. Sonın’ menen bir qatarda Sony du’nyadag’ı en’ iri media kompaniyalardın’ biri bolıp tabıladı. Sony Music Entertaiment dawıs jazıw markasına, Columbia Pictures ha’m TriStars Pictures kinostudiyalarına, MGM kompaniyasının’ tolıq filmler arxivine iye.

Tariyxı
Kompaniyag’a 1946 jılı 7 mayda Akio Morita ha’m Masaru İbuka tiykar salg’an. Kompaniyanın’ da’slepki atı “Tokyo tsusin kogyo kabusiki kaysa” bolg’an, qısqasha totsuko dep atalg’an. Yag’nıy, ha’zirgi “Sony” eki so’zdin’ birikpesinen kelip shıqqan bolıp, latınsha sonus “dawıs” ha’m inglisshe “sunny boys” (ku’n balaları) al yaponsha “kishkentay danıshpanlar” ma’nisine iye. Sony ataması 1958 jıldın’ yanvar ayında qoyılg’an.

Ko’p jıllar dawamında kompaniyag’a Morita basshılıq etti, ekonomikada u’lken jetiskenliklerge eristi. 1950 jılları kompaniya o’zinin’ da’slepki “TR-63” radio apparatın islep shıg’arg’an.

O’nimleri
Sony Rolly atlı muzikag’a oynaytug’ın robottı, AIBO atlı iyt ta’rizli robottı islep shıg’ardı. 1970-1980 jılları birinshi portativli Walkman audiopleyerdi islep shıg’ara baslaydı. 1983 jılı Philips kompaniyası menen birgelikte kompakt-diskler islep shıg’ardı.

Al 1990 jıldın’ ishinde Sony 500 ge shamalas jan’a o’nimler jaratqan.

1994 jıldın’ son’ında korporatsiya PlayStation oyın konsolın usınadı. Onın’ sa’tli bolg’anı sonshelli 2000 jılı PlayStation 2, 2006 jılı Playstation 3 oyınların islep shıg’aradı.

Sony xızmetleri
-Sony Corporation - turmısta paydalanatug’ın elektro-o’nimler ha’m elektronikalıq o’nimler;
-Sony Computer Entertaiment – PlayStation oyınları ha’m video oyınlar;
-Sony Pictures Entertaiment – kinokartinalar o’ndiriwshi;
-Sony Music – muzikalıq taraw;
-Sony Financial – Finanslıq sfera;
-Sony Ericson – mobil telefon o’ndiriwshi;
-Sony VAIO – noutbukler o’ndiriwshi;
-Sony Bravia – televizorlar o’ndiriwshi.

2010 jıldın’ 31 martında korporatsiyanın’ ulıwma jumıshılar sanı 167 900 adamdı qurag’an.


Paydalanılg’an a’debiyat: en.wikipedia.org/wiki/Sony
Su’wret: onlysp.com