Ta’g’dirim dep bilip, ta’g’dirge ko’ndim,
Da’rtti berdin’, «shu’kir qudayım»-dedim.
İnsannın’ o’mirde qılmısın ko’rip,
Shıdamay da’rtimlerim qag’azg’a berdim.

Da’rtime aq qag’az qap-qara boldı.
Ko’z jaslarım tamıp daqlarg’a toldı.
Nalıg’an kewlimde gu’na’lar tolı.
Shıdamay nalıshım qag’azg’a berdim.

Ko’rgenin isledi qollar qıynalmay.
O’tirikti so’ylep janın qıynamay.
Qıyanetti ko’rdi ko’zler tartınbay.
İnsannın’ qılmısın qag’azg’a berdim.

«Men adamman» dep mardiyip so’ylegen.
O’mirdi ko’p ko’rip azap shekpegen.
Shıbıq tiyip awır da’rtti ko’rmegen.
Bendenin’ so’zlerin qag’azg’a berdim.

Qam su’tti ko’p iship ko’zler qamasıp.
Jan-jaqqa qaramay du’n’ya talasıp.
Jasaymız-aw tuwısqanlar tırnasıp.
O’mirdin’ qılmısın qag’azg’a berdim.

Min taqpa qam su’tke, Ana mehri bar.
Anasın qa’dirler, al kimler xorlar.
Ko’rip deymiz «qam su’t emgen-g’o bular».
A’tten’ olardı da qag’azg’a berdim.

Ha’r na’rsenin’ eki jag’ı bolg’anday.
Aq-qaranı ayıralmay qalg’anday.
Jaqsı-jaman parıqsız bolıp qalg’anday.
Tu’sinbey sorawım qag’azg’a berdim.

Nahaq «haqpan» dep aytısıp jen’ip ju’r.
Naxaqlıg’ın qara ko’zler ko’rip tur.
Aytalmaydı nahaq so’zin so’ylep jur.
Nahaqtın’ du’n’yasın qag’azg’a berdim.

Da’rtime aq qag’az qap-qara boldı.
O’mirde qag’azday daqlarg’a toldı.
Pa’klikti izlegen ko’zlerim taldı.
Ma’nzilin tabalmay qag’azg’a berdim.


Mirbek Pazilov 20.11.2011.