“Реал” футбол клубының президенти Флорентино Перес бразилиялы футболшы Неймарды өз командасында көргиси келеди. Бул ҳаққында испаниялы Mundo Deportivo баспасөзи хабарлады.

Неймар “Сантостан” кететуғын ўақытта ойыншыға “Барселона” ҳәм “Реал” таласқан еди. Ҳүжимши каталония клубын таңлаған еди. Ал усы жазда ПСЖ командасына алмасты. Футбол тарийхындағы ең қымбатқа баҳаланған футболшы ретинде рекорд жаңалады. Нәтийжеде жаңа команда менен 2022-жылға шекем шәртнамаға қол қойды.
“Реал” командасының басшысы Роналдуның орнына Неймар болыўын қәлейди екен. Португалиялы футболшы ҳәм клуб арасындағы шәртнама мүддети 2021-жылы тамамланады. Испаниялы клуб усыған шекем Неймарды өз командасынан көргиси келеди.

Айырым рәсмий емес дереклер бойынша “Реал” командасы клубының президенти футболшының әкеси менен ушырасқан. Баласы ПСЖ дан басқа клубқа алмасатуғын жағдай жүз берсе, “Реалды” таңлаў усынысын билдирген.

Парижли команда Неймарды сатқысы келмейди. Клуб президенти Нассер Аль-Хелаифи хызметкерлерине Неймарға барлық шараятларды жаратыўға тапсырма берген.

Бразилиялы футболшыны командаласлары жыллы күтип алған жоқ. Себеби ПСЖ ойыншыларына Неймардың командаға қойған талабы унамады. Мәселен оның жеке өзине еки физиотерапевт қәнигеси менен тәмийинленген. Команда ойыншыларына шынығыў ўақтында Неймарға қарсы тәртипсиз ойнаўға болмайтуғыны ескертилген. Ал футболшы командалық қорғаныў шынығыўларына қатнаспайды. Сондай-ақ мәўсим соңына шекем пенальти тебетуғын болады.