Март айының екинши ҳәптесинде Facebook тармағы пайдаланыўшылары арасында BFF сөзи тарқалып кетти. Олардың айтыўы бойынша, бул сөз қәўипсизликти тексереди. Бирақ бул қәте түсиник болып шықты, буның басқа себеби бар екен.

Бир неше күн алдын, қарақалпақстанлы фейсбук пайдаланыўшыларының арасында да тармақ қәўипсизлигин тексериўдиң қызықлы усылы пайда болды. Олардың айтыўы бойынша, бул усылды фейсбук ийеси Марк Цукербергтиң өзи усынған.

Пайдаланыўшылар өзиниң аккаунтын тексериў мақсетинде жазбаларға (постларға) ямаса пикирге (комментарии) BFF қысқа сөзин жазды. Егер сөз жасыл реңге боялса, ҳәммеси дурыс, аккаунт қорғалған. Егер қара реңге боялса, демек парольди алмастырыў керек.

Бирақ тармақ пайдаланыўшылары қәтелести. Себеби BFF (“best friends forever ” – “бәрҳама ең жақсы дослар”) – бул Facebook Delight статусының арнаўлы хызмети екен. Ол автоматлы түрде сөз дизбеклерин таңлайды ҳәм анимация пайда болады. Facebook Delight хызметинде усы сыяқлы бир неше рус тилиндеги сөзлер бар – “Поздравляю”, “Мои поздравления” ҳәм “Я люблю тебя”. Оларды социяллық тармақ қызыл-сары ҳәм ашық-қызыл реңге бояйды. Бул хызметте ҳәр түрли тилдеги 10 ға шамалас қысқарған сөзлер бар.