2012 жылдың 5 ноябрь күни Facebook рәсмий веб сайты социаллық тармақларды шеннен тыс пайдаланыў денсаўлыққа зыян деп жәриялады. Илимпазлар Facebook сыяқлы социаллық тармақта күни-түни онлайнда отыратуғынлардың ҳақыйқый өмирдеги адамлар менен қарым қатнас дәрежесиниң төменлеўине алып келеди, делинбекте.
Аталған информацияға сүйенсек ҳәр күни Facebook-тың барлық пайдаланыўшыларының тиккелей тармақта пайдаланатуғын ўақтын есаплағанда, бир миллиард бес жүз миллион минутқа туўры келеди екен.

Facebook әлеминдеги адамлар бир-бири менен информацияларды бөлисиў жағынан жақын дос ретинде танысып, күнделикли онлайн арқалы байланысады, көк экранға, интернетке ғәрезлилик сезими пайда болады. Соңғы ўақытлары Facebook админстрациясы өз пайдаланыўшыларына рети менен пайдаланыўға кеңес береди.

Социологлар менен психологлардың айтыўынша «Facebook сыяқлы социаллық тармақлар тез ҳәмде аңсат қарым-қатнас қылыў ретинде көринеди де, көз алдымыздағы информациялар толқыны сизди жутып кете береди. Бирақ, ол сизиң өмириңизди емес ал ол сизиң ўақтыңызды өлтириў менен бирге, ҳақыйқый өмирдеги досларыңыз бенен өз-ара қатнасықларыңызды алыслатады ҳәмде ҳақыйқый өмириңиздеги қандайда бир қатнасықларға немқурайлық пенен қарап баслаўға алып келеди.» дейди. Демек солай екен социаллық тармақлар арқалы виртуал өмирде қанша дос арттырсақта ҳақыйқый өмиримиздеги досларымыздан ҳеш қашан бас кешпейик. Ҳақыйқый досты қандайда бир текстлер ямаса жансыз сүўретлерде келтирилген онлайн (виртуал) жоллар арқалы емес ал әжайип өмир жолларынан излеген мақул, сонда ғана ҳақыйқый дослық мәнги сақланады.


Калмуратов Б.