Shotlandiyada spirtli ishimlikler ishiwshiler menen gu’resiwdin’ jan’a jolı oylap tabıldı. Bunın’ ushın mobillik qurılmalarg’a ornatılg’an arnawlı Drinking Mirror atlı bag’darlama islep shıg’ıldı. Bul bag’darlama tek g’ana ha’yellerge arnalg’an.

Bag’darlamanın’ atqaratug’ın jumısı ju’da’ a’piwayı bolıp, paydalanıwshı uyalı telefonına ornatılg’an bag’darlamanı iske qosıp, bag’darlama sha’rtlerin orınlawı kerek. Yag’nıy da’slep paydalanıwshı uyalı telefonı arqalı su’wretke tu’sip, keyin bir ha’pte dawamında ishken arag’ının’ mug’darın ko’rsetiwi kerek. (bir butılka spirtli ishimlikti bag’darlama – 175 ml dep qabıl etedi). Mag’lıwmat berilgennen keyin bag’darlama su’wretke tu’sken ha’yeldin’ 10 jıldan keyingi bet-a’lpetin islep ko’rsetedi. Eger paydalanıwshı araqtı ishe berse, uyalı telefonındag’ı su’wretine qarap tobag’a keledi deydi joba avtorları. Bul jobanı tek ha’yel adamlarg’a arnag’anıda biykar emes, sebebi ha’yel adamlar o’z kelbetinin’ jaqsı saqlanıwı ushın qolınan kelgen ha’mme isti qıladı eken.

Drinking Mirror bag’darlaması android 2.2 ha’m onın’ jan’a u’lgilerine de ornatıladı eken. Usı jıldın’ mart ayına shekem bul bag’darlamanı biypul ju’klep alıw jolg’a qoyılg’an.
Statistika boyınsha son’g’ı 20 jıldın’ ishinde Shotlandiyadag’ı 30-44 jastag’ı ha’yel qızlardın’ spirtli ishimliklerge ha’wesligi eki esege ko’beygen.


su’wret ha’m derek ko’zi: theverge.com