Studentlik – bul o’mirimizdin’ umıtılmas ha’m quwanıshlı ma’writlerge tolı da’wiri desek qa’telespeysiz. Bul da’wirdin’ qa’diri jıllar o’tip, jas minip, turmıs g’alma-g’allarına gezleskenimizde g’ana o’zinin’ haqıyqıy ko’rinisin tabadı. Onda jaslıq jiger, onda muhabbat, onda a’wmet ha’m en’ baslısı ha’reket ja’mlengen. “Studentlik- altın da’wir” – dep biykarg’a aytılmag’an. Sebebi, keleshek ushın za’ru’r ha’m en’ a’hmiyetli ta’lim-ta’rbiyanı mine, usı qısqa mu’ddet ishinde u’yrenemiz, ta’jiriybe arttıramız. Studentlik da’wirdin’ qızıqların, mashaqatlı ku’nlerin qag’azg’a tu’sirer bolsaq, ol payansız shıg’armag’a aylanıwı so’zsiz.

Litseyde oqıp ju’rgen paytlarım universitet studentlerine ha’wes ko’zi menen qarar ha’tteki, janımnan o’tip ketse mag’an da usı jollardan ju’riw nesiyp etermeken?- degen oy menen o’zgeshe na’zer taslar edim. A’lbette, jaqsı niyetim ha’m tınımsız izlenisim meni de usınday baxıtqa miyassar etti ha’m universitet atlı muqaddes da’rgayg’a jeteledi. Konstantin Dmitrievish aytqanınday: “Eger jaslıq niyeti, talpınısları bolmag’anında, insan o’miri bir orında toqtap qalg’an bolar edi. Ko’plegen jaqsı pikirler jaslıqtın’ ta’kirarlanbas ma’writlerinde payda boladı”

Haqıyqatında da, jaslıqta islegen azg’ana ha’reketimiz, miynetimiz ku’ni kelip o’zinin’ jemisin bereri anıq. Sebebi, ha’r qanday ha’reket na’tiyjege qurıladı. Na’tiyje bolsa, bizdi ko’klerge ko’terip, ja’ne de alg’a talpındıradı. Studentlik da’wirdin’ altıng’a ten’elgeninde hikmet ko’p. Altın ıssı da, suwıqta da, jalında da o’zligin joytpaydı. Demek, usı waqıt aralıg’ında alg’an bilimimiz, jaratıwshılıq qa’biliyetimiz ha’m ha’reketlerimiz ma’ngillik.


Gu’ljahan Seytnazarova
Su’wret: yandex.ru