Usı jıldın’ 27-31 may ku’nleri Xorezm wa’layatında joqarı oqıw orınları arasında “Studentler ba’ha’ri 2013” festivalı o’tkerildi. “Kamolot” JSH, Joqarı ha’m orta arnawlı bilimlendiriw ministrligi, Ma’deniyat ha’m sport ministrligi ha’mde Xorezm walayatı ha’kimiyatı ha’m basqada ministrlikler sho’lkemlestiriwinde usı festival joqarı ko’terin’kilik da’rejede o’tkerildi. Festivalg’a No’kis qalasınan altı joqarı oqıw orınlarınan 36 student jaslar belsendi qatnastı. Olardın’ jetewi “O’zbekstanda ta’biyattı qorg’aw ha’m ekologiyalıq ortalıqtı jaratıw” temasında o’tkerilgen ilimiy konferentsiyada o’z temaları menen qatnasıp, ekologiyalıq sharayat ha’m ta’biyiy sharayatlardın’ ekonomikalıq jag’dayı, xalıq salamatlıg’ın bekkemlew ha’m awıl xojalıg’ı, sonday-aq ekoturizmdi rawajlandırıw, tabiyiy resurslardan o’nimli ha’m u’nemli paydalanıw boyınsha o’zlerinin’ ilimiy usınısların bayan etti.

Festivaldın’ birinshi ku’ninde Qaraqalpaqstan Respublikası ha’m wa’layatlardan kelgen studentlerdi saltanatlı tu’rde ku’tip aldı, so’ytip ku’nnin’ ekinshi yarımında 100 student Jaloliddin Manguberdi kompleksi esteligine gu’l qoydı. “Avesto” bag’ kompleksinde joqarı oqıw orınlarının’ jetiskenlikleri o’zinde sa’wlelengen ko’rgizbe sho’lkemlestirildi.



Son’ “Avesto” amfiteatrında 19:00 de festivaldın’ ashılıw ma’resimi ha’m kontsert bag’darlaması bolıp o’tti.

28 may ku’ni “O’zbekstanda ta’biyattı qorg’aw ha’m ekologiyalıq ortalıqtı jaratıw” temasında ilimiy-a’meliy konferentsiya bolıp o’tti, og’an 332 den aslam student jaslar, professor oqıtıwshılar 4 sektsiya boyınsha qatnastı. Sonday-aq usı ku’ni “EKO” aktsiya sho’lkemlestirildi. Al 18:30-20:00 aralıg’ında “Quwnaqlar ha’m ziyrekler” tan’lawı o’tkerilip, og’an NMPİnın’ Turan komandasıda belsendi qatnasıp, usı komanda ag’zası “En’ shoq qız” nominatsiyası jen’impazı boldı.

29 may ku’ni 8 bag’dar boyınsha ziyrek studentler tan’lawı o’tkerildi. Tan’lawda student jaslar ilimiy maqalaları, texnikalıq islenbeleri, veb ha’m komyuter bag’darlamaları joybarları menen belsene qatnasıp, olardı prezentatsiya etti. To’reshiler ta’repinen bahalandı. Pikir ha’m usınıslar bildirildi.



Ku’nnin’ ekinshi yarımında “Kamolot-Turne” ma’deniy ekskursiyası shen’berinde Xiywa qalasına sayaxat sho’lkemlestirildi. Al keshki waqıtta Xiywa qalasındag’ı “Qibla toza bog’” kompleksinde ma’deniy bag’darlama sho’lkemlestirildi.









30 may ku’ni ha’r tu’rli temalar boyınsha toparlarg’a bo’linip, sheberlik sabaqları o’tkerildi, sonday-aq studentler awıl xojalıg’ının’ joqarı ta’jiriybeleri: biogaz alıw, intentsiv bag’ ha’m teplitsa jaratıw boyınsha tanıstı. 14 komandadan ibarat 84 student qatnasıwında “Zakovat” intellektual teleoyını bolıp o’tti. Al 14:30-18:30 aralıg’ında “Nihol” studentlerdin’ teatr tamashaları festivalı o’tkerildi. Og’an rejissyor Bektilew Nızamatdinov basshılıg’ında O’zbekstan ma’deniyat ha’m ko’rkem o’ner institutı No’kis filialı studentleri “Artist” atlı saxnalıq ko’rinisin qoyıp, respublika boyınsha 1 orındı iyeledi. Sonday-aq usı ku’ni Urgenish qalasındag’ı ko’rnekli orınlarg’a, esteliklerge, jan’adan jaratılg’an bag’larg’a, Amudarya jag’asına, tariyxıy esteliklerge ekskursiyalar sho’lkemlestirildi. Keshki waqıtta estrada juldızlarının’ kontsert bag’darlaması bolıp, qatnasıwshılar atqarılg’an qosıqlarg’a kewilli oynadı.







Festivaldın’ son’g’ı ku’ni 31 mayda fotosessiya sho’lkemlestirildi ha’m tan’law jen’impazları arnawlı diplom, sertifikat ha’m basqada sawg’alar menen sıylıqlandı. Ha’r eki jılda o’tkeriletug’ın “Studentler ba’ha’ri” festivalı U’rgenish qalasında mine usınday joqarı ko’terin’kilik da’rejede juwmaqlanıp, ha’r bir student qa’lbinde umıtılmas waqıya bolıp, altın ha’ripler menen ma’ngi saqlanıp qaldı.


Kalmuratov B.