2013 jıldın’ 15-16 may ku’nleri Tashkent qalasında “BEST SOFT UZBEKISTAN 2013” bag’darlamalıq o’nimlerdin’ milliy ko’rgizbesi bolıp o’tedi. ko’rgizbege tiykarınan elimizdegi, sonday-aq sırt elli informatsiya texnologiyaları kompaniyaları – bag’darlamalıq o’nimlerdi islep shıg’arıwshılar, provayderler, ilimiy ha’m bilimlediriw orınları, ministrlikler ha’m basqada sho’lkemler o’z islenbeleri menen qatnasadı.

Sonı aytıp o’tiw lazım, 17 may Birlesken Milletler sho’lkemi ta’repinen Xalıqaralıq informatsiya ja’miyeti ku’ni dep ja’riyalang’an ha’m sol ta’repten ha’ptenin’ za’ru’r waqıyaları – Milliy bag’darlamashılar forumı ha’mde “BEST SOFT UZBEKISTAN 2013” Milliy ko’rgizbenin’ sho’lkemlestirilgenligi elimizdin’ bul tarawdag’ı xalqara baslamag’a qosıp atırg’an o’zine ta’n u’lesi bolıp tabıladı.

Mag’lıwmatlarg’a qarag’anda, ha’zirgi waqıtqa shekem ma’mleketimizde bag’darlamalıq o’nimlerdi islep shıg’arıw ha’m engiziw menen shug’ıllanıwshı 200 den artıq subyekt iskerlik ko’rsetpekte. Bul jılg’ı ko’rgizbegede en’ tan’lawlı, ha’mmenin’ itibarın o’zine tartatug’ın joybarlar ko’pshilikke tanıstırıladı ha’m prezentatsitya etiledi.

Bul jılg’ı ko’rgizbege TİTU No’kis filialı oqıtıwshısı Elmurad Babajanov penen usı oqıw da’rgayının’ studenti Kalmuratov Bekbosın bag’darlamalıq o’nimlerin qoyıw huquqın jen’ip aldı. Ha’zir olar qızg’ın tayarlanbaqta.

- Bıyıl bul ko’rgizbege qızg’ın tayarlıq u’stindemiz, o’tken jılı bul ko’rgizbege belsendi qatnastım ha’m o’zim islep shıqqan bag’darlamalıq o’nimlerim qa’niygeler ta’repinen joqarı bahalandı, sonday-aq o’zim qatarı jas bag’darlamashılardın’ joybarları menen tanıstım, sırt elli iri kompaniyalardın’ o’nimleri sonday-aq elimizdegi softver sanaatındag’ı iri kompaniyalar menen bir qatarda menin’ ha’m bag’darlamamnın’ qoyılıwı men ushın ha’m TİTU ha’m TİTU No’kis filialı ushında u’lken jetiskenlik dep oylayman. Bul jılıda qızg’ın ku’ni-tu’ni tayarlanbaqtamız. Sebebi ko’rgizbe shen’berinde “En’ jaqsı student jobası” tan’lawınada qatnasaman. – deydi TİTU No’kis filialı studenti Bekbosın Kalmuratov.

Bul jılg’ı ko’rgizbege TİTU No’kis fililalı oqıtıwshısı Elmurad Babajanov “Bilimlendiriwde interaktiv xızmet ko’rsetiw sisteması” jobası menen qatnasadı. Bul jobanın’ qolaylıqları zamanago’y veb texnologiyalar tiykarında jaratılg’an bolıp, joqarı oqıw orınlarında iskerlik alıp barıwshı oqıtıwshılar, studentler ha’m basqada paydalanıwshılarg’a xızmet ko’rsetiwdi avtomatlastırıw imkaniyatın berip, mu’ta’jlikke tiykarlang’an halda esabatlar du’ziledi ha’m interaktiv xızmetler a’melge asırıladı. Jobanın’ baslı maqseti joqarı oqıw orınları studentlerinin’ reyting sistemasınan baslap, oqıtılg’an pa’nlerdi, metodikalıq komplekske tiyisli mag’lıwmatlardı avtomatlastırıw ha’m ministrlikten ha’r bir joqarı oqıw ornı alg’an mag’lıwmatlardı o’zinin’ serverinde saqlawı ha’m onı kafedra ha’m bo’limlerge elektron halda jetkerip beriwden ibarat.

Sonday-aq bul jılg’ı ko’rgizbege Bekbosın Kalmuratovtın’ inglis tilin o’z betinshe u’yreniwshiler ushın arnalg’an “Q-LING” kompyuter bag’darlamasının’ 4-jan’a versiyası menen qatnasadı. Bul bag’darlamanın’ 4 versiyası 2013 jılı islep shıg’ılg’an bolıp, onın’ 1,2,3 versiyalarınan ko’p artıqmashılıqlarg’a iye, sonday-aq 4-versiyada bag’darlama interfeysi o’zbek tilinde de iskerlik ko’rsetedi, informatsiya qa’wipsizligi de joqarı da’rejede qorg’alg’an ha’m Windowstın’ barlıq versiyaların qollay aladı. Ha’zirgi waqıtta Bekbosın Q-LINGnin’ 5 versiyasın islewdi baslap jiberdi. Onın’ mu’mkinshilikleri mobil baylanıs qurılmaları platformalarına maslasqan boladı, yag’nıy Android ha’m Mac OSlarınada beyimlesedi.

Ko’rgizbe shen’berinde “Bag’darlamalıq tamiynat – jıl markası”, “IT-bilimlendiriw tarawındag’ı en’ jaqsı kompaniya”, “2012 jılda engizilgen en’ jaqsı joybar”, “Bag’darlamalıq tamiynat tarawındag’ı en’ jaqsı studentler islenbesi” nominatsiyaları boyınsha respublika tan’lawının’ jen’impazları sıylıqlanadı.

Sonday-aq jumısqa ornalasıw ha’m ka’sipke bag’darlaw boyınsha bos jumı orınları yarmarkası o’tkeriledi.








Tayrov Qudiyar,
Kalmuratov Bekbosın

Su’wret: O’tken 2012 jılg’ı “BEST SOFT UZBEKISTAN 2012” ko’rgizbesinen.