Tashkent qalasında usı jıldın’ 15 may ku’ni "BEST SOFT UZBEKISTAN 2012" Bag’darlamashılardın’ milliy forumı bolıp o’tti. Forumda O’zbekstan softver sanaatı, bir qatar sırt elli jetekshi kompaniya qa’niygeleri ha’m ekspertler sonday-aq ma’mleket ja’ma’a’t sho’lkenleri ha’m mekeme wa’killeri qatnastı.

Bag’darlamashılardın’ bul milliy forumında bag’darlamalıq o’nimlerdi islep shıg’arıw ha’m onı engiziw tarawının’ jetekshi qa’niygeleri de jıynaldı. Forumda xalıqaralıq ha’m jergilikli informatsiya-kommunikatsiya texnologiyaları kompaniyaları – o’ndiriwshiler ha’m integratorlar, kontent islep shıg’arıwshılar, xızmet ko’rsetiwshi provayderler, ilimiy ha’m bilimlendiriw mekemeleri, ministrlik ha’mde mekeme wa’killeri qatnastı. Olar usı tarawdag’ı son’g’ı jetiskenlikler haqqında tolıq mag’lıwmat berip, ta’jiriybe almasıp prezentatsiyalar ha’m bilimlendiriw seminarları o’tkerildi.

Bul forumdı o’tkeriwden tiykarg’ı maqset jetekshi qa’niygeler, ma’mleket basqarıw organları, biznes ha’m ja’ma’a’tshilik institutları wa’killerin tarawdag’ı en’ son’g’ı tabıslar menen tanıstırıw, olarg’a o’z- ara ta’jiriybe almasıw, bag’daralamalıq o’nimlerdi islep shıg’arıw ha’m engiziw tarawın rawajlandırıw aldag’ı keleshegin ortag’a salıw, tarmaqtı rawajlandırıw, kadrlar tayarlaw protsesin huquqıy ta’repten ta’miyinlew boyınsha usınıslar islep shıgıw ushın imkaniyat jaratıw
Forum dawamında Z. Raxmatullaev bag’darlamalıq ta’miyinleniw sanaatı rawajlanıwının’ ma’mleket ta’repinen qollap quwatlanıwı ha’m
jetiskenlikleri haqqında bayanat jasadı.

Ma’mleketimizde bag’darlamalıq o’nimlerdi islep shıg’arıwg’a qa’niygelesken ka’rxanalarg’a bir qatar jen’illikler jaratılg’an.
Bag’darlamalıq o’nimler bazarın rawajlandırıw maqsetinde xalıqaralıq baylanıslardı ken’eytiw boyınsha bir qatar jumıslar a’melge asırıldı. Atap o’tsek, bag’darlamalıq o’nimler islep shıg’arıwshı 16 jetekshi kompaniyalar menen ushırasıw ha’m prezentatsiyalar o’tkerildi, Hindistannın’ bag’darlamalıq o’nim islep shıg’arıwshı "HCL Technologies Ltd." ha’m "InfoSys" kompaniyaları delegatsiyası O’zbekstanda bolıp, usı bag’darda bir qatar kelisimlerge erisildi. Sonday-aq usı jıldın’ 29-fevralında İnformatsiya texnologiyaları tarawında O’zbekstan baylanıs ha’m informatsiyalastırıw agentligi ha’m Microsoft Ireland Operations Limited penen birge islesiw kelisimine qol qoyıldı.
Bag’darlamashılar milliy forumında usı bag’dardag’ı usınıslar qabıl etiw ushın qolaylı imkaniyat ekenligi atap o’tildi. Sonday-aq bag’darlamashı qa’niygeligi boyınsha kadrlar menen ta’miyinlew, ta’jiriybeli bag’darlamashılardı tayarlaw ha’m kompyuter bilimlendiriw kursların sho’lkemlestiriw boyınsha so’z etildi.

Forum dawamında bir qatar temalarda: jaslar ushın arnalg’an bag’darlama – internet hu’jimine qarsı; bag’darlamalastırıw tili, tu’rli protsesslerdi avtomatlastırıw; ID-kartalar; Internet-banking; bag’darlamalıq o’nimler bazarın rawajlandırıwda ilimiy izertlew iskerliginin’ roli; bag’darlamalastırıw boyınsha intellektual jarıslar ha’m aralıqtan oqıtıw ushın bag’darlama sheshimi durıslıg’ın avtomat testen o’tkeriwshi sistema haqqında ha’m tag’ıda basqa temalarda bayanatlar jasaldı.
Forum usı taqılette ta’jiriybe almasıwlarg’a bay, qızıqlı ha’m mazmunlı o’tti.