Суриялик аёл юртида бўлаётган урушлардан қочиб, уч ва беш яшар болаларини қайиқда денгиз орқали тинчроқ ўлкаларга олиб кетмоқчи бўлади. 2015-йилнинг сентябр ойи бошларида Туркияда денгиз қирғоғидан жонсиз ҳолда ётган уч яшар гўдакнинг танаси топилади…

Ерни суйиб ётган юзингдан сенинг,
Қисматинг бағримни ёқди, болажон.
Баxтни кўролмаган кўзингда сенинг,
У малъун кимсалар йўқ бўлар қачон?
Балки, қора ишлар босган дунёда,
Нигоҳинг бир тоза сувга қаратган.
Баxтсизлик кўрмасин энди зиёда,
Деди-ю, ёнига олди Яратган.
Айланайин, болам, ўргилай, болам,
Оғзингдан бол томиб, юрмасмидинг сен.
Оҳ-у дод, нолага тўлмаса олам,
Бир паҳлавон йигит бўлмасмидинг сен?
Балиқлар йиғлади тополмай чора,
Тўлқинлар эркалаб элтиб қўйдилар.
Инсоният афсус чекиб бир бора,
Ён дафтарига қайд этиб қўйдилар.
Ватанинг боғ-у роғ қилмоқ ўрнига,
Култепа, вайрона этган номардлар.
Келажак йўлини кўрмайди нега?
Юракни аёвсиз кемирар дардлар.
У xалқ авлодининг орзуларини
Шу юртнинг боласин сўзида туйдим.
Она Ватаним деб, табассум айлаб,
Толеъдан чақнаган кўзида туйдим.
Тўлқинлар эркалаб,қирғоқни қучган,
Болажон, жаннат айвонига боргин.
Камолинг, тинчинг деб денгизга чиққан
Фаришта онангнинг ёнига боргин…


Аббос Раҳим.
Бўстон.