Shıg’arman tiri bolsam adam bolıp,
Ju’rmeymen bul du’nyada nadan bolıp.

Shayırdın’ bul qosıq qatarları men ushın balalıg’ımnan tanıs. Mektep da’wirinde bul qosıqtı yadlag’an bolsam, mine endi bul qosıq ma’ngi yadımda. Bul qosıqtan ta’sirlenip o’mirge degen ko’z qarasım teren’irek o’zgere basladı. Sebebi ha’r bir adam o’z aldına qoyg’an maqseti bolıwı kerek ha’m sol maqsetke tuwrı joldı tan’lap jetisiwimiz kerek.

Men Taselov Ja’nibek 1991 jılı 22-dekabrde Moynaq rayonında tuwıldım. Rayonımızdag’ı №17 sanlı orta mektepte oqıp bilim aldım. Jaslıg’ımnan matematika pa’nine ju’da’ qızıqtım. Tu’rli pa’n olimpiadalarına qatnasıp joqarı orınlardı iyeleginimdi de aytıp o’tiwim orınlı. O’mirdegi su’renim “Tuwrı joldı tan’lasaq, jetisermiz muratqa”. Menin’ bul qızıg’ıwshılıg’ıma ata-anam biyparq bolmay oqıwım ja’nede bilim alıwım ushın ken’ sharayatlar jaratıp berdi. 2009 jılı mektebimizdi tabıslı tamamladım. Mag’an bilim bergen ustazlarıma alg’ısım sheksiz. A’sirese İdiris Ametov, Ulbosın Polatovalardın’ arqasında bilimimdi teren’irek jetilistirdim ha’m tuwrı joldı tan’lap Tashkent informatsiya texnologiyaları universiteti No’kis filialına tapsırıwg’a bel bayladım.

2010 jılı Tashkent informatsiya texnologiyaları universiteti No’kis filialı, informatika ha’m informatsiyalıq texnologiyalar qa’nigeligine oqıwg’a tapsırıp, test sınawlarınan joqarı 182 ball toplap, ma’mleketlik grand tiykarında oqıwg’a qabıl etildim. Quwanıshım sheksiz! Sebebi o’zim tan’lag’an qa’nigelikte student bolıw baxtına miyassar boldım. Bul oqıw da’rgayında alg’an bilimlerimdi ja’nede jetilistirdim. Mag’an fizika matematika ilimlerinin’ doktorı, professor Niyetbay Uteuliv ha’m fizika matematika ilimlerinin’ kandidatı, dotsent Shayaxmet Burxanov ustazlıq etti. Matematikalıq modellestiriw boyınsha ilimiy jumıs u’stinde islep atırman. Birinshi kursımnan baslap ja’miyetlik jumıslarg’a belsendi qatnastım ha’m fililımızda bolıp o’tken kompyuter grafikası pa’ni boyınsha olimpiada da birinshi orındı aldım.

Ha’zirgi waqıtta usı qa’nigeligim boyınsha Online bilimlendiriw jobası u’stinde islep atırman. Birinshi gezekte bul jobanı tuwılg’an jerim Moynaq rayonına engizbekshimen ha’m rayonımızdın’ informatsiyalıq texnologiyalarına bolg’an qızıg’ıwshılıg’ın ja’nede ku’sheytiw. Sonday-aq Moynaq rayonının’ ra’smiy veb saytın islewdi baslap jiberdim. Sonday-aq filialımızda sho’lkemlestirilgen IT klubtın’ ag’zasıman. Bul klub tiykarınan o’zlerimiz qatarı student jaslardan quralg’an. Bul klubta biz qandayda bir ma’seleni ortag’a taslap ha’m onı sheshiwge ha’reket etemiz.

Men bul universitette oqıp atırg’anımnan ju’da’ baxıtlıman. Sebebi bul jerde du’nyadag’ı universitetlerden kem emes sharayatlar jaratılg’an ha’m bul sharayatlardan o’nimli paydalanıp, bilimimizdi ja’nede jetilistirip, video konferents baylanıs arqalı Tashkentli professor oqıtıwshılardan sabaq o’tip atırmız ha’m aymaqlıq filial studentleri menen pikir almaspaqtamız.

Studentlik altın da’wir dep biykar aytılmag’an eken, sebebi bul da’rgayda o’tken ha’r bir waqtım men ushın ju’da’ qızıqlı ha’m tez o’tip baratırg’an sıyaqlı. Sebebi keshe g’ana birinshi kurs bolıp, oqıp ju’rgen bolsaq mine endi u’shinshi kurstı pitkeriw qarsan’ında turmız. Zımırap o’tip atırg’an waqıt toqtap turmaydı, sonlıqtan bu’gingi jaratılg’an imkaniyatlardan jaqsı paydalanayıq sebebi jaslıqta alg’an bilim tasqa oyılg’an nag’ıs sıyaqlı.


Taselov Ja’nibek
Tashkent informatsiya texnologiyaları
universiteti No’kis filialı, informatika ha’m
informatsiyalıq texnologiyalar qa’nigeligi studenti.