Allanazarov Allan 1990 jılı 27 fevralda No’kis qalasında tuwılg’an. Kishkentay waqtınan baslap qosıqqa ha’m muzikag’a qattı qızıqqan. Onın’ bul qızıg’ıwshılıg’ın ha’m qosıq aytıwg’a bolg’an talantın sezgen ata-anası balalar muzika mektebine bergen. Ol jerde Allan fortopiano bo’liminen sabaq aldı ha’m sol jerdegi bayram keshelerine belsene qatnasıp qosıqlar atqardı. Ol sonday-aq No’kis qalasındag’ı Na’wshe balalar toparının’ salisti bolıp, ko’plegen tan’lawlarg’a qatnastı ha’m olardan sıylıqlı orınlardı iyeledi. Allan Allanazarov 2004 jılı bolıp o’tken Muxtar Ashrabiy ko’rik tan’lawının’ jen’impazı boldı. Bul tan’lawlardan ruxlang’an Allan o’z do’retiwshiligin ja’nede qızg’ın dawam ettirdi.

Birinshi prodyusserim a’kem.
Allan qaraqalpaq esradasına kirip keliwine sebepshi bolg’an insan o’z a’kesi dep biledi. Yag’nıy og’an bul jolda prodyusserlik etip, estradanın’ qır-sırın u’yretken da’slepki insan onın’ a’kesi. Balalıq waqtınan baslap Allan o’z qosıqların fortopiano arqalı shertip, janlı atqarıp keldi. Onın’ jag’ımlı dawısı ko’pshiliktin’ kewlinen shıqtı. Mine endi Allan estradag’a qa’dem basıpta keldi, endi ol qosıqların studialarda jazdırıp xalıqtın’ kewlinen orın alıw edi. Allan Allanazarov aldına qoyg’an maqsetine eristi yag’nıy ol o’zinin’ birinshi qosıg’ın atqarıp ha’m og’an klip tu’sirirdi.

Birinshi tu’sirgen klipimiz
Allan Allanazarov 2007 jılı “Janım ayt” atamasındag’ı qosıg’ına klip tu’sirdi. Onın’ qosıg’ına tu’sirilgen bul klip a’sirese jaslar arasında xitke aylandı ha’m ko’pshilik kewlinen orın aldı. Bul klipinen keyin Allan toqtap qalmay qızg’ın o’z u’stinde ja’nede isley basladı. Na’tiyjesinde ko’plegen qosıqların shıg’arıp, olarg’a video-klip tu’sirdi. Talantlı kompozitorlar menen islesti.

Birinshi kontsertim
Ko’pshilik jaslar kewlinen orın alg’an qosıqshı Allan 2011 jılı No’kis qalasında o’zinin’ jeke shıg’armashılıq kontsert bag’darlamasın berdi. Allan atqarg’an qosıqlarının’ jaslar arasında xitke aylang’anının’ ja’ne bir da’lili usı jeke shıg’armashılıq kontserti boldı. Sebebi bul kontsertke azg’ana mu’ddet ishinde biletler satılıp ketti ha’m kontsert ashıq teatrda o’tkerilip, orınlar ıqlasbentlerine lıq tolı boldı. – Menin’ u’lken jetiskenligimnin’ biri usı kontsertim desem qa’telespeymen, usı kontsertimnen keyin men u’lken juwapkershilikti sezip, o’zim u’stimde ja’nede qızg’ın isley basladım. Jan’adan-jan’a qosıqlar u’stinde islep atırmız ha’m olardın’ xitke aylanıwı ushın erinbey miynet etemiz –deydi Allan Allanazarov.

Janlı dawısqa ne jetsin
- Men fonogrammasız qosıq aytıwdı unataman, jaslıg’ımnan fortopiano shertip qosıq atqarg’anman, janlı dawısqa ne jetsin!, biraq ha’zirgi waqıtta ko’pshilik elektron formatqa ko’shken, sonlıqtan qosıqlarımızdı elektron formatta da jazdırıp qoyıppız. – deydi Allan.

İnternet ha’m men
- Ha’zirgi waqıtta internettin’ mu’mkinshilikleri artıp baradı. Bul tarmaqtan men ha’m arasında paydalanıp turaman. Ha’tte qosıqlarımızdın’ ayırımların internet tarmag’ına jaylastıramız. Ol jerde de qosıqlarımız xitke aylanıp turadı. Ko’pshilik ıqlasbentler ha’zirgi waqıtta jan’a qosıqlardı internet tarmag’ınan ko’shirip aladı, sonlıqtan men ha’m jan’a qosıqlarımdı qoyıwg’a ha’reket etemen.

Sotsiallıq tarmaq belsendileri sizlerden o’tinish…
- Ha’zirde sotsiallıq tarmaq paydalanıwshıları ko’pshilikti quraydı. Ha’r tu’rli sotsiallıq tarmaq belsendileri de ju’da’ ko’p. Jeke o’zim m.Agent ha’m Однокласники tarmaqlarınan reti menen paydalanıp turaman. Biraq menin’ atımnan login ashıp alatug’ınlarda ko’p. Sonlıqtan sotsiallıq tarmaq belsendilerine bir iltimasım bar atımnan login ashpan’.

Oqıwım birinshi orında
Ol o’z do’retiwshiligin ja’nede bekkemlep joqarı bilim alıw maqsetinde NMPİ-ne oqıwg’a tapsırdı ha’m student bolıw baxtına eristi. Ha’zirgi waqıtta Allanazarov Allan No’kis ma’mleketlik pedagogikalıq institutının’ Muzikalıq ta’lim bag’darının’ 1-kursında oqıp atır. Ol o’z so’zinde oqıwı birinshi orında ekenligin aytıp, ustazlarınan vokaldan teren’ bilim alıp atırg’anlıg’ın ayttı.

Do’retiwshilik iskerlik…
- Ha’zirgi ku’nde jan’a klip-lerim boyınsha A. Tolegenov penen islesip atırg’an bolsam, qosıqlarım boyınsha K. Zariddinov penen do’retiwshilik jolında birge islesip atırmız. Sonday-aq Maqset O’temuratov, marhum Rashid Xojasov ha’m Miratdin Abdullaevlardın’ qosıqların tın’lap turaman. Do’retiwshiligimdegi ja’ne bir jan’alıq Milliy qosıqlar u’stinde islep atırman. Keleshekte inglis tilinde de qosıq aytıw niyetim bar.

Mag’an unaytug’ınlar
- Ko’pshilik tin’ beretug’ın sorawı, qanday qızlar unaydı dep. Mag’an iybeli, nazlılıg’ı jarasqan ha’m do’retiwshiligimdi sıylaytug’ın qızlar unaydı –deydi Allan. Sonday-aq Allannın’:
sportı: stol tennis ha’m tay boks
tag’amı: palaw
ren’i: aq
ishimligi: sherbet
hobbiyi: kino ko’riw

Shou-biznes yamasa toy-biznes haqqında
- Birewler tek toy ushın qosıq isleydi, sebebi toydag’ı tabıs kontserttegi tabısqa qarag’anda ko’p bolsa kerek. Biraq ko’rkem o’nerdi tek toy ushın g’ana almastırmaw kerek. Sonlıqtan men jaslardın’ ha’m xalqımızdın’ kewlinen shıg’atug’ın qosıqlar u’stinde islewdi maqul ko’remen.

Jaqın ku’nlerde…
Ha’zir Allan Allanazarov “Jaqsı kelin bol anama” atlı qosıg’ı u’stinde islep atır. Sonday-aq bul qosıq u’stinde klip tu’sirilipte atır. Jaqın ku’nlerde bul qosıq xalqımızg’a ina’m etilip, ko’pshiliktin’ kewlinen shıg’ıwına ka’mil isenemiz.

Bayram qutlıqlawı
- Ha’mme hayal qızlarımızdı, analarımızdı jaqınlasıp kiyatırg’an 8 mart xalıqaralıq hayal qızlar bayramı menen shın ju’rekten qutlıqlap qalaman! Baxtımızg’a barqulla analarımız saw bolsın! Elimiz aman-jurtımız tınısh bolsın!

Bizde talant iyesi bolg’an Allan Allanazarovtın’ do’retiwshilik islerine ha’m oqıwlarına tasqın tabıslar tileymiz. Talpınıp, o’z u’stinde tınbay islep atırg’an bul qosıqshımızdın’ jetiskenlikleri ja’nede ko’p bolıwına tileklespis.


B. Kalmuratov “Megaline.uz” ushın arnawlı.