Ене, келин ортасында,
Бир өмирлик даў болар
Сол себепли енелерге
Айтатуғын сөзим бар.

Келинлердиң айыбы не?
Сүйгениме балаңызды,
Жақсы көриў айып болса,
Сүйместиңиз атамызды.

Турмыс қурыў өмир заңы,
Ҳеш ўақытта өзгермейди.
Қотласаңда балаңызды
Келиниңе сездирмейди.

Келин пақыр ерте турса,
Үйиң жыйнап аўқат қылса,
Ерте турып ҳәм кеш жатып,
Не айтсаңыз тайын қылса.

Бир жыл болмай бала туўса,
Әўладыңды даўам қылса,
Сағынсада еки күнлеп.
Төркининде қоналмаса.

Үйдиң бийпул қорықшысы
Ҳәм бийминнет хызметшиси.
Сондадағы жақсы ат жоқ
Дым жақпайды еткен иси.

Қәйин ене анаханлар.
Бунша неге мин тағасыз,
Келин болған күниңизди
Қалайынша умытасыз?

Өз үйиниң қуяшы ол.
Ҳәр үйдиң ҳаўасы басқа,
Сол ҳаўаға үйренгенше
Қарасыўға дым болмаспа.

Қәйин енениң топырағынан
Жаралады дейди келин,
Егер сол гәп туўры болса,
Тап өзиңе усар келин.

Балаңыздың қостары ол,
Шығарда тек жаны бөлек
Ақлығыңның анасы ол,
Мазалыда болар түйнек.

Соның ушын келинди де
Қызыңыздай көре билиң
«Ҳәр ким сыйлағанның қулы»,
«Қул» болып хызмет етер келин.


Гөззал Ибраймова.