2015-жыл 15-апрель күни Өзбекистан Саўда-санаат палатасының Қарақалпақстан Республикасы басқармасы мәжилислер залында “ Исбилерменлердиң интеллектуал мүлк объектлериниң ҳуқықый қорғалыўы ” темасында оқыў-семинары өткерилди. Оқыў-семинарды өткериўден тийкарғы мақсет Республика аймақларында исбилерменлердиң интеллектуал мүлк объектлериниң ҳуқықый тәрептен қорғалыўы тараўындағы билимлерди жетилистириў, бул тараўды тәртипке салыўшы норматив ҳүжжетлер ҳаққында ҳәм интеллектуал мүлк объектлерине патент алыў тәртиплери ҳәм қағыйдалары ҳаққында қатнасыўшыларға мағлыўмат бериў болып табылады.

Оқыў-семинарды Өзбекистан Саўда-санаат палатасының Қарақалпақстан Республикасы басқармасы баслығы Х.Қайпназаров кирис сөзи менен ашып берди ҳәм басқарып барды.

Семинарда қатнасыўшылар дыққатына “Товар белгилериниң ҳуқықый қорғалыўы” ҳәм “Санаат үлгилериниң ҳуқықый қорғалыўы” темаларында презентациялар көпшилик нәзерине усынылды.

Қатнасыўшылар оқыў-семинары даўамында өзлериниң қызықтырған сораўларын берди ҳәм тараў қәнигелеринен жуўаплар алды.

Бүгинги күнде Қарақалпақстанда товар белгилериниң ҳуқықлары қорғалып, патентлестирилмекте. Деген менен көпшилик исбилерменлер өзлериниң товар белгилерине патент алмаған. Сонлықтан исбилерменлер өз өнимлери ушын патент алыў бойынша тараў қәнигелеринен көплеген мағлыўматларды алып, оның бүгинги күнде зәрүр екенлиги семинар барысында атап өтилди.

Мысалы, Нөкис қаласындағы такси хызметлерин усыныўшы компаниялар өз такси атларына товар белгиси ретинде патент алмаған. Соның ақыбетинде көплеген такси атлары қайталанбақта. Мысалы Ташкент қаласындағы такси атларын Нөкис қаласында, ямаса Нөкис қаласындағы такси атларын Тахиаташ ҳ.т басқа районларда ушыратыў мүмкин. Сонлықтан товар белгисин патентлестириў бизнес раўажланыўы ушын дәўир талабына айланбақта. Булар ҳаққында тараў қәнигелери тәрепинен кеңирек мағлыўматлар берилди.

Сондай-ақ ҳәзирги ўақытта исбилерменлеримиз тәрепинен “Гүртик”, “Кеспас”, “Торақ” сыяқлы миллий тағамларымыздың қурғақ түри өндирилип, оларды орап, арнаўлы этикетка менен сатыўды жолға қойған. Қәнигелер пикиринше, “фаст-фуд” ретинде де бул тағамлар аңсат таярланады екен. Мысалы асығып турған ўақытта қурғақ кеспасты ыссы суўға бир қайнатып, қатыққа қосып таярланса оның дәми ҳәм пайдасы сырт ел “фаст-фуд” өнимлерине қарақанда жүдә пайдалы. Ал жүўери гүртик сыяқлы миллий тағамларымыз алдағы ўақытта өнер-үлгиси ретинде патентлестириледи. Тәкирирланбас үлгиде исленген қарақалпақ қара-үйин ҳәзирги ўақытта патентлестириў жумыслары алып барылмақта. Булар ҳаққында оқыў-семинары барысында қатнасыўшыларға атап өтилди.

Өткерилген бул оқыў-семинары, киши бизнес ҳәм жеке исбилерменлик субъектлери ушын әмелий тәрептен әҳимийетке ийе болып, олардың интеллектуал мүлк объектлерин ҳуқықый жақтан қорғаў, сондай-ақ ислеп шығарылып атырған өнимлерди сертификатластырыў тараўындағы билимлерди жетилистириўге мүмкиншилик береди.


Қалмуратов Б,
www.megaline.uz ушын арнаўлы.