Усы жылдың 13 март күни Нөкис қаласында «Инновациялық идеялар, технологиялар, ҳәм жойбарлар» аймақлық ярмаркасы болып өтти. Ярмаркада жоқары оқыў орынлары ҳәмде илимий изертлеў институтларында таярланған 150 ге жақын исленбелер көпшилик нәзерине усынылды.

Ярмарканың мақсети елимизде инновациялық исленбелер ҳәм жойбарларды өндириске енгизиў ҳәмде елимиз ушын илимий изертлеўлер ҳәм инновациялық исленбелердиң бас бағдарларын анықлаўдан ибарат.

Көргизбеге жергиликли шийкизат тийкарында жаңа өнимлерди ислеп шығарыў, энергия ресурс үнемли технологиялар қуяш ҳәм қайта тиклениўши энергия дереклери, имаратларды локал ысытыў ҳәм жарық бериў системалары, Информациялық технологиялар, пахта тазалаў техникалары, санаат ҳәм халықтың турар жайлары ушын қурылыс материялларын ислеп шығарыў, өсимликлерди шыбынлардан қорғаў системасы ҳ.т. басқалар көпшилик нәзерине усынылды.

Өзбекстан Пәнлер академиясының Қарақалпақстан Республикасы бөлими алымлары тәрепинен жергиликли шийкизатлар минерал төгин ислеп шығарыў, қурылыс материяллары, шығындыларды қайта ислеў, бай руўхый мийрасымызды топлаў ҳәм сақлаўға байланыслы 20лаған жаңа идея ҳәм исленбелер көпшилик нәзерине усынылды.



Ярмаркаға Ташкент информация технологиялары университети Нөкис филиалының профессор-оқытыўшылары ҳәм студенлери тәрепинен жаратылған ҳәм патент алынған, сондай-ақ жаратылып атырған веб ҳәм бағдарламалық исленбелер, өнимлер, системалар қойылды ҳәм усы жойбарларды турмысқа енгизиў бойынша көплеген шәртнамалар дүзилди.



Илажға Ташкент Өсимлик затлар химиясы институтының илимий хызметкерлери қатнасты ҳәм олар тәрепинен өндирилген 20 дан аслам дәри дәрмақлар, 5 түрли аўыл хожалық өнимлери ҳәм 2 түрли спортты раўажландырыў тараўындағы дәрилик өнимлер ярмаркаға қойылды.


Калмуратов Б.
Megaline.uz ушын арнаўлы.