Мектеп кушағында өткен балалық,
Артта қалган сол бир қәте шалалық,
Енди бизди байлап турар аралық,
Шын досларым мен сизлерди сағынаман.

Умтылғанман болыў ушын билимдан,
Үлгергенмен оқыў баслар жылымнан,
Оқытыўшым жақынсаң-аў, жанымнан
Муғаллимим мен сизлерди сағынаман.

Питкериўши болып бизлер кетсек те,
Ең бахытлы демлер қалды мектепте,
Ҳеш бир мәнзил жеткермейди мектепке,
Жан мектебим мен өзиңди сағынаман.

Жаңа мәнзил, жаңа дунья, жаңа күн,
Өзге оқыў дәргайында биз бүгин,
Бирақта, умытып кетпеслик ушын,
Сол бахытлы демлеримди сағынаман.

Есиңдеме, мектебим, сол дәўирим?
Тәрк етсем де, басылмай ҳеш хәўирим,
Қумсайбердим оқыўшылық дәўирин,
Сенде өткен дәўиримди сағынаман.

Есиңдеме, үш қыз бирге дос едик,
Ҳешким бизди айырмастай көз едик,
Тилге питкен маржан-маржан сөз едик,
Қәдирданым, мен сизлерди сағынаман.


Бийбисара Худайназарова.