2004 jılları akademiyalıq litseyde oqıp ju’rmen. İnformatika sabag’ı men ushın en’ qızıqlı ha’m unatatug’ın sabag’ım. Sabaq barısında pa’n oqıtıwshımız qolındag’ı uyalı telefonın ko’rsetip, “Mınaw ele keleshekte kishi kompyuterge aylanadı” – degen so’zleri ele esimde.

Ustazımnın’ sol waqıttag’ı aytqan boljamı mag’an da’slebinde unamag’an edi. “Sonda biz mına kishkentay temir qutıg’a u’n’ilip otıramızba?, Jazıwları dım mayda bolatug’ın shıg’ar?, İnternetide onsha qızıq bolmaytug’ın shıg’ar?” – degen sorawlar tuwıldı. Biraq waqıttın’ o’tiwi menen usı temir qutının’ kompyuterge aylanıwına isendik.

Jıllar izinen jıllar o’tip, İ. T texnologiyalar jedellik penen rawajlanıp, ha’tte oylamag’an na’rselerimizdin’ haqıyqatqa aylanıp atırg’anının’ gu’wası boldıq. İnternet texnologiyalarının’ jan’a basqıshı baslanıp, onın’ tezligin burıng’ıg’a salıstıra almastay da’rejege jettik. Sol 2003-2004 jılları sayttan bir su’wretti ashıw ushın ha’tte minutlap ku’tip otırg’anımızdı eslesek, bu’gin bug’an iseniw qıyın. DOS, MS DOS, Windows 98, Windows 2000 bulardın’ ha’mmesi bu’gin tariyx betlerinde jazılg’a sıyaqlı. 3,5 megabayt ko’lemge iye jumsaq disklar qashanlardur qasımızdan taslamay alıp ju’retug’ın bolsaq ha’m onı mına kishkentay disketanın’ ishinde eki kitaptın’ mag’lıwmatı bar desek ko’pshilik hayran bolar edi. Paskal, Beysik sıyaqlı programmalastırıw tillerinde qara displeyde bag’darlama du’zip, kompyuterdin’ qaraqalpaqsha so’ylegenine quwanatug’ında edik. Matritsalı printerdin’ jag’ımlı dawsıda ele esimde.

… Jıllar menen jollar. Mine aradan qısqa g’ana 10 jıl waqıt o’tip ketti. Usı qısqa 10 jıldın’ ishinde jan’adan jan’a tanıslar arttırsaq al burıng’ı jaqınlarımızdın’ ayırımları aramızdan ketkenin de ko’rdik. Ba’ri esimde. Usı qısqa g’ana 10 jıldın’ ishinde İ.T texnologiyalardın’ jedellik penen rawajlang’anın ha’m onın’ turmıstın’ barlıq tarawlarına kirip kelgeninde ko’rdik. Endi mine 9 jıl aldın aytqan ustazımızdın’ boljamının’ durıslıg’ın da ko’rdik. Ko’riw menen birge paydalanıp ta atırmız. Awa ha’zir mobil baylanıs qurılmaları rawajlanıp, olar arasındag’ı ba’seki de ku’sheyip atır. Endi operatsiyalıq sistemalardı tek jeke kompyuterlerde emes, al mobil baylanıs qurılmalarında da ko’rip atırmız. Jeke kompyuterlerdin’ funktsiyaların o’zlerinde ja’mlep atırg’an bul sistemalar ha’zir xalıq iygiliginde.
Ja’ne 10 jıldan son’ bu’gin jan’alıq bolıp ko’ringen texnologiyalar erten’ tag’ı sonday edi dep aytıp otırıw ha’mmemizge nesip etsin!


Bekan’s blog