Технология жеделлик пенен раўажланып атырған бүгинги күнде кешеги әпсана бүгин ҳақыйқатқада айланып атырғаны бизге белгили. Мобил байланыс қураллары бүгин турмысымызға терең енип, ҳәр ким өз телефон номерине үйренип қалды. Басқа оператор хызметине өтпекши болса, бурыңғы номерин көзи қыймаўы мүмкин. Сонлықтан еки-үш СИМ карталарды алып жүриўге ямаса өзгертип пайдаланыўға туўра келеди. Бул болса өз нәўбетинде еки-үш номерге ийе болыў керек деген сөз.

Сонлықтан бундай ҳалатлардың алдын алыў мақсетинде дүньяда MNP технологиясы ислеп шығылған. Мысалы сиз номериңизди өзгертпей басқа операторға өтиў деген сөз. Телефон номери пайдаланыўшы меншигинде қалады, яғный компания тәрепинен номери басқа пайдаланыўшыға сатылмайды. Сол номери менен қәлеген операторына өтиў яки оның хызмети унамаса сол номерин сақлап қалған ҳалда басқа операторға өтиў мүмкиншилигине ийе. Қәнигелердиң пикиринше, MNP технологиясы “мобиллик ғәрезлилик”тиң алдын алады. Бул технология “мәңгилик номер” деп те аталады.

Mobile Number Portability (MNP) – технологиясы ҳәзирги ўақытта дүньяның 70 тен аслам мәмлекетинде қолланылады. Ең дәслеп бул хызмет түри 1995 жылы Гонконгта енгизилди. Бирақ бул елде 1999-жылы толығы менен жумыс ислей баслаған. 1997 жылда Сингапур халқыда бул хызмет түринен пайдалана баслады. 1999 жылдан баслап Англия ҳәм Голландия да иске қосылды. 2002 жылда Европа мәмлекетлери бул технологиядан пайдалана баслады. Ал АҚШта болса 2003 жылы қолланылды. Россияда 2004 жылы енгизиле баслаған, бирақ Россия 2009 жылы бул технологияға толығы менен өте алған жоқ ҳәм бүгинги ўақытта бул технология бул елде қолланылмайды.

Еслетип өтемиз, бул технология – номер ҳәм префикслерди сақлап қалған ҳалда, операторларды өзгертиўге имканият жаратады.

Дүнья тәжирийбесине сүйенетуғын болсақ, бундай технологияға толығы менен өтиў ушын бир неше жыл ўақыт сарыпланады. Алдағы ўақытта бундай хызмет түри бизиң елимизде де пайда болыўын ўақыт көрсетеди.