Муҳаббат миллатни,ирқни танламас,
Унинг ёлғиз уйи девона юрак,
Дил xаста бўлганда,моҳир шифокор
Давони қайлардан топмоғи керак?
Ишққа қучоқ очган муштдайин макон,
Кўксингда зарб билан уриб турса соз,
Бироқ,мен билмадим,қалб ила кўнгил
Қаерда жойлашур биолог устоз?
Инсон танасида турли элемент,
Биттаси оғирдир,биттаси енгил.
Xимиклар,айтинг-чи қайси моддадан
Ташкил топган ўзи аслида кўнгил?
Севги туғилади,ўзга инсоннинг
Қалбига муҳаббат дурин терсангиз.
Математик устоз,иложи бўлса
Кўнгил формуласин топиб берсангиз.
Физика устозим,айтинг-чи менга,
Қалб қандай зарядни ҳосил килади?
Бу сўз ёлғон бўлса,нечун ҳар доим
Бири иккинчисин торта билади?
Бу тушунча ҳали узоқ яшайди,
Тариx саҳнасидан ўчмайди зинҳор,
Дарвоқе,тариxчи домла айтсангиз,
Илк муҳаббат қачон этилган изҳор?
Адабиёт аҳли сўзингиз керак,
Нечун қалб ўғриси бўлур ягона?
Муҳаббат кирмаган кўнгил йўқ аxир,
Бу туйғу сизга ҳам эмас бегона…
Қолдим айтолмайин сўз саволларга,
Ҳар ёна боқарман,ҳар ёна ҳайрон.
Бир қаро қошни деб ўт тушди танга,
Ва ўзим жавобин англадим шу он!


Аббос Раҳим.
Бўстон.