Бугунги кунда, юртимизда эркин фуқаролик жамиятига асосланган очиқ демократик ҳуқуқий давлатни барпо этиш, халқнинг, айниқса, ёш авлоднинг ҳуқуқий онгини юксалтириш, иқтисодий билимларини ошириш давлат миқёсидаги масалалардан ҳисобланади.

Республикамизнинг иқтисодий соҳада юксалишида сўзсиз, солиқларнинг ўрни беқиёс. Шундай экан, эртанги келажагимиз бўлган ёш авлоднинг солиқлар ҳақидаги дунёқарашини бойитиб бориш, солиқ қонунчилиги ва маданияти бўйича тушунчалар бериш уларнинг ҳар тамонлама ўсиб улғайиши, камол топиши ва иқтисодий билимларининг ортиб боришида катта аҳамият касб этади. Сабаби-бугунги ёш авлод-эртанги солиқ тўловчи ёки ертанги солиқ ходими.

Ўтган давр мобойнида Қорақалпоғистон Республикаси давлат солиқ идоралари мутасадди ходимлари томонидан болаларга солиқлар ва уларнинг аҳамияти, мақсади ва вазифалари, Ҳукуматимиз ва Президентимиз томонидан солиқ соҳасига оид қабул қилинган қатор қарор ва Фармонлар асосида Республикамизда юритилаётган солиқ сиёсати тўғрисида кенг тушинтиришлар бериш мақсадида жойларда бир неча бор тадбирлар, кўрик танловлар ва
ўқув-семинар машғулотлари ўтказилди. Ўтказилган тадбирларда республика бўйича жами 5000 дан ортиқ ўқувчи ёшлар иштироки таъминланди.
Мана шундай тадбирлардан бири куни кеча Қорақалпоғистон Республикаси Давлат солиқ бошқармаси томонидан Тўрткул ва Элликқалъа туманларидаги «Лочин» ва «Орол болалари» дам олиш оромгоҳида бўлиб ўтди.

Биз бир жамоа бўлиб эрталабдан Тўрткул туманларидаги «Лочин» болалар дам олиш оромгоҳига етиб бордик. У ерда дам олаётган ўқувчи ёшлар ва уларнинг тарбиячилари бизни қувонч билан кутиб олишди. Эрталабдан тадбирнинг биринчи бўлими, яъни ўқув-семинар бошлаб юборилди. Семинарда бошқарманинг мутахассислари томонидан ўқувчи ёшларга солиқлар ва уларнинг турлари, аҳамияти, республикамизинг иқтисодий ривожланишида солиқларнинг тутган ўрни ҳақида батафсил тушинтиришлар берилди.

Бундан кейин оромгоҳда савол-жавоб тариқасида давра суҳбати ўтказилиб, унда ўқувчи ёшлар ўзларини қизиқтирган барча саволларга мутахассислар томонидан тўлиқ жавоблар олишди.

Куннинг иккинчи ярмида ва Элликқалъа туманларидаги «Орол болалари» дам олиш оромгоҳида бўлиб у ерда ҳам ҳордиқ чиқараётган болаларга солиқ мавзусида кенг тушинтиришлар бердик. Тадбирда ормгоҳда дам олаётган
200 нафардан ортиқ ўқувчи ёшлар иштирок этди.

Ўтказилган тадбирдан болажонларнинг қандай тасуротларга эга бўлганлиги ва олган билимлари бошқарманинг Ахборот хизмати томонидан Тўрткул ва Элликқалъа туман «Камолот» ЁИҲ билан биргаликда ўтказган викториналарида кўзга ташланди. Ҳар хил мавзуларда олиб борилган викториналарда болаларнинг билим савияси, эпчиллиги, ақлий етуклиги ва солиқ бўйича олган билим даражалари намоён бўлди.

Тадбир сўнгида энг фаол иштирок этган ўқувчи ёшлар Қорақалпоғистон Республикаси Давлат солиқ бошқармасининг махсус Фахрий ёрлиғи ва қимматбаҳо совғалари билан тақдирланди.

Президентимиз таъкидлаб ўтганидек, «Болаларимиз бизлардан кўра ақилли, билимли, доно ва албатта бахтли бўлмоғи керак». Кун давомида кўтаринки рухда ўтказилган тадбир давомида болаларимиз онгида солиқ тушунчасининг ва солиқлар борасидаги билимларининг ортганлиги бизда эртанги кунга умид ва яна бир карра ишонч уйғотди.

Ўқувчи ёшларнинг билим олишлари учун барча шароитларни яратиб бериш, уларнинг сиёсий, иқтисодий, маънавий-маданий, миллий-мафкуравий билимларини орттириш, улар орасида учраб турадиган ҳар хил жиноятчилик ва ҳуқуқбузарликларга йўл қўймаслик, соғлом мухитни тўғри шакиллантириш, уларнинг дўстона муносабатларини кучайтириш, бўш вақтларини мазмунли ўтказиш, ёшларимизни хар тамонлама етук, Ватанга мухаббат, садоқат рухида тарбиялаш ҳар бир соҳа вакилларининг бош мақсад ва вазифасига айланиши керак.


М.Чимбергенова
Қорақалпоғистон Республикаси
Давлат солиқ бошқармаси Ахборот
хизмати бош мутахассиси-бошқарма
бошлиғининг матбуот котиби.