Бүгинги жасларымыз байланыс орнатыў ушын телефон қоңыраўларынан гөре Whats App яки Telegram бағдарламасынан пайдаланғанды мақул көрмекте. Еки программа да инсан ушын байланыс орнатыў имканиятын жаратып береди. Ким қайсы программадан пайдаланады деген сораўға жуўап излеген едик.

Ват-саптан пайдаланыўшылардың саны бизде де көпшиликти қурайды. Бирақ кейинги ўақытлары Telegram программасынан пайдаланыўшылардың саны да артып бармақта. Пайдаланыўшылар саны жағынан Ват-сап Telegram нан үстин турсада Telegram ның имканиятлары көбиректей түйиледи. Ват-сапта видео, сүўретлер ҳәм байланыс орнатыў имканияты жоқары болса, Telegram да қәлеген форматтағы мағлыўматларды жеткерип бериў имканияты бар. Ват-сапта персонал компьютерлер ушын қосымшалар жоқ, ал Telegram да болса қәлеген платформа, веб-версияларға орнатыў имканияты бар. Жергиликли пайдаланыўшылар қайсы программадан пайдаланды екен. Олардың пикирине қулақ түрейик.

Надира Садуллаева: Мен көбинесе Whatsappтан пайдаланаман. Себеби, жақынларым, көплеп танысларым шет мәмлекетлерде болғанлығы себепли, бул тармақ сәўбет ушын жақсы имканият жаратып береди.

Улзада Қошқарова: Мен өзим Whatsapp тармағынан пайдаланаман. Бул тармаққа көпшилик досларым киретуғын болғанлықтан, олар менен сөйлесиў ушын тармақтан пайдаланаман.

Замира Қуўатова: Мен Telegram тармағынан пайдаланаман. Бул тармақтан пайдаланыўымның себеби, ҳүжжетлер ҳәм суўретлерди жибериўде ҳешқандай иркилислер болмайды.

Whatsapp тармақ базарына ертерек кирип келгени ушын да пайдаланыўшылардың басым көпшилиги оннан пайдаланады. Қәлеген жаңа пайдаланыўшы да Whatsapp ты таңлайды. Себеби, басқа дослары да соннан пайдаланады, демек орталық бар. Telegram программасының имканиятлары да жоқары, лекин ҳәзирше пайдаланыўшылары жағынан Whatsapp қа теңлесиўи қыйын. Солай болса да Telegram да бир қатар имканиятлар бар.


Х.Атажанов.