Ҳәзирги ўақытта дүнья жүзи бойынша интернет пайдаланыўшыларының көпшилиги социаллық тармақлардан пайдаланады. Ҳәттеки айырым жасларымыз интернет десе көз алдына социаллық тармақлар келеди. Ҳәзирги глобалласыў процессинде Facebook, Twitter, Мой Мир, Однаклассники сыяқлы социяллық тармақлардың пайдаланыўшылары жылдан жылға артып бармақта. Байланыс қуралына айланған бундай социяллық тармақлардың тәсирине түсип қалған жасларымызда аз емес. Ал ҳәзирги ўақытта бизиң жасларымыз қайсы социяллық тармақ хызметлеринен пайдаланады? Ҳәм қандай мақсетлерде деген сораў өз-өзинен туўылады.

Бул сораўдың жуўабын жасы үлкен ата-апаларымыздан да сорасаңыз айтып бериўи мүмкин. Бул Mail.Agent (m.Agent) байланыс қуралы. Ҳәттеки халқымыз арасында m.Agent ҳаққында ҳәзиллерде ушырасады. «Ат пенен излеген адамыңды m.Agent-тен табасаң, Баламды ҳеш жерден таба алмай атырман деген ата-анаға қоңсысы m.Agent-тен излеп көрдиңбе?» деген ҳәзиллерде көбейип баратыр. Ал бул тармақтан пайдаланыўшылардың көпшилиги жаслар десекте қәтелесемиз. Себеби үлкен-кишиниң кеўлинен шыға билген бул тармаққа ересек адамларда дизимнен өтип «агентшилердиң» қатары күн сайын артып бармақта.

2003 жылы Россияда mail.ru компаниясы өз искерлигин баслаған еди. Дәслепкисинде бул компания өз искерлигин электрон пошта хызметинен баслаған болса, кейин ала ол турмыстың барлық тараўларын өз ишинде қамтыйтуғын ири жобалар комплексин жәмлеп үлкен порталға айланды. Мине усы жобалардың ишинде m.Agent хызметиде пайда болды. Дәслепкисинде бул байланыс қуралынан интернет тармағына жалғанған жеке компьютер пайдаланыўшылары пайдаланған болса ал ҳәзирги күнге келип мобил байланыс қуралларынан пайдаланыўшыларда бул хызметке қосылған. Информация әсиринде интернет тармағы ҳәр бир үйде емес ал ҳәр бир адамның қалтасында десек қәтелеспеймиз. Сонлықтан да m.Agent хызметинен уялы телефонлар арқалы қәлеген орынларда пайдаланыў мүмкиншилиги бар деген сөз.

m.Agent хызметиниң мүмкиншиликлери ҳаққында көп нәрсе айтыўға болады. Бирақ биз оған тоқталып өтпеймиз.

Соңғы ўақытлары көшеде де, жумыста да, бәндиргилерде де, аўқатланыў орынларында да m.Agent тармағынан пайдаланып атырған жасларымызды ушыратамыз. Ҳәттеки автобустың ишинде m.Agent арқалы байланыста болып, түсиў бәндиргисинен өтип кеткен жасларды да ушыратамыз. Сондай ақ той мерекелеримизде айырым қыз-келиншеклеримиз қасындағы қурдасларының сәўбетинен алыслап қолындағы темир қутыға қарап жаңалық күтетуғындай көз үзбейди ямаса қолы тынбай бир нәрселерди жазып отырғаныныңда гүўасы болып атырмыз. Көпшилик жағдайларда алыс жақындағы ағайын-туўысқанларды да, қурбы-қурдасларды да жақынластырып қатнасықты беккемлейтуғында мине усы той. Ал бундай имканиятлардан бас кешип, әтирапындағылардың сәўбетине қулақ аспай виртуал өмирдеги дослары менен сәўбетлесип отырғанларды көрсең олар өзлериниң ҳақыйқый өмирдеги жақынларынан қарым қатнасы алыслап виртуал өмирдеги досларын ҳақыйқый өмирдеги досларына алмастырды ма екен деп те қаламыз.

Ҳәр заттың өз мөлшери, шегарасы болғаны сыяқлы алтын ўақтымызды үнемли пайдаланып, m.Agent-тен де тек ғана зәрүрли ҳәм мазмунлы нәрселер ҳаққында сәўбетлессек мақсетке муўапық болады. М.Agent арқалы қаншама дос арттырсақта ҳақыйқый өмиримиздеги досларымыздан бас кешпейик. Дана халқымыз «жүз сомың болғанша, жүз достың болсын» деп бийкар айтпаған.


Авторы: Калмуратов Б.