Мектеп муғаллимниң балалар менен жақсы ислескени яки оларға тыянақлы билим бере алғаны оқыўшыларының өмирден өз орынан таўып, маман қәниге болып жетискенлиги менен белгиленеди. Лекин, балалар менен тиллесип, олардың кеўлине жол таўып, жақсы билим бериў қыйын. Буның ушын ҳәр муғаллим өз методынан, тәсилинен пайдаланады. Усындай өз оқыўшыларының кеўлине орыс тили ҳәм әдебияты пәнине болған қызығыўшылықты жайластыра алған инсанлардың бири пайтахтымыздағы 1-санлы қәнигелестирилген мәмлекетлик улыўма орта билим бериў мектебиниң муғаллим Шынар Альжанова.

Жақында Шынар Альжанованың мийнети жоқары баҳаланды. Ол «Русский мир» қоры, «Российская газета», Россия сыртқы ислер министрлиги, Москва қаласы сыртқы экономикалық ҳәм халықаралық байланыслар департаментиниң қоллап-қуўатлаўы менен ҳәр жылы шөлкемлестирилип киятырған уллы орыс классиги А.С.Пушкинниң ҳүрметине орыс тили ҳәм әдебият пәни муғаллимлери арасында шөлкемлестирилип киятырған таңлаўдың лауреты болыў бахтына еристи.







Шынар Альжанова үлкен тәжирийбеге ийе устазлардың биринен есапланады. Ол 1991-жылы Волгаград педагогикалық институтының орыс тили ҳәм әдебияты қәнигелигин питкерген. Өз педагогикалық искерлигин сол жылы пайтахтымыздағы 19-санлы орта мектепте орыс тили ҳәм әдебияты пәни муғаллими болып баслаған. Буннан соң болса он жыл даўамында 34-санлы мектепте минсиз жумыс ислеген. 2006-жылдан баслап болса пайтахтымыздағы қәнигелестирилген мектеп орыс тили ҳәм әдебияты пәнинен сабақ берип келмекте.

Ол муғаллимшиликтиң машақатлы кәсип екенлигин жақсы биледи. Солай болса да балалар менен ислескенди, олардың кеўлине жол тапқанды жақсы көретуғыны толып тасып айтып берди. Бир неше жыл мектепте лаўазамлы жумысларда ислегенин де жасырмады, лекин, «оқыўшыларға сабақ берип, олардың арасында болғанды қәлегеним ушын бул жумыслардан бас тарттым» деп атап өтти.

- Бул таңлаў ҳаққында бир неше жыллардан берли билемен. Ҳәр жылғы таңлаў белгили бир тема шеңберинде шөлкемлестириледи. Быйылғы таңлаўдың темасы «Жеңис тили. Сизиң оқыўшыларыңыз 1945-жылдың майы ҳаққында не биледи?» болды. Расын айтыўыс керек, оқыўшыларым урыс туўралы, онда аталарының қатнасқанын онша билмейтуғын еди. Усыны есапқа алып урыс ҳаққындағы шығармаларды тәсирли етип оқып берип, оқыўшыларда түсиник пайда ете басладым. Кейин ала болса оқыўшыларым ата-анасын сорап урысқа қатнасқан аталары ҳаққында сорап, оларды сүўретлерин де алып келип көрсетти. Урыс ҳаққында қосықлар фестивалында шөлкемлестирдик. Урыс ҳаққында аталарымыздың жеңис ушын жанын пидә еткенин келешек әўладқа жеткериўге болған умтылысым нәтийже берди деп ойлайман, -дейди Шынар Альжанова.

Шынар Альжанованың Москва қаласына болған сапары зая кетпеди. Себеби, ол жақта болып дүньяның 50 мәмлекетинен келген муғаллимлер менен танысып тәжирийбе алмасыў бахтына миясар болды.

- Москва қаласына сапарымыз үлкен тәсирге бай болды. Таңлаўдың рәсмий бөлими менен биргеликте тәжирийбе алмасыў, мәдений илажлары да шөлкемлестирилди. Тәжирийбе алмасыў ушын Москва қаласындағы 1231-санлы француз тилине қәнигелестирилген мектепте болдық. Сабаққа кирдик, муғаллимлери менен сабақларды өтиў методлары менен де таныстық. «Русский мир» фонды, «Российская газета» да қабыллаўда болдық. Соның менен бирге Москва қаласы күни концертине, дүньяға белгили болған А.С.Пушкин атындағы музейде болып, дөретпелер менен жақыннан таныстық, - дейди Шынар Альжанов.

Ол таңлаўдың жеке раўажланыўына, тәжирийбесин және де раўажландырыўына болған умтылысын және де беккемлегенин айрықша атап өтти. Буның айқын дәлили сыпатында оқыўшыларының Россия ҳәм басқада мәмлекетлер мектеплери оқыўшылары ушын жылда өткерилип киятырған «Русский медвежонок» таңлаўына қатнасып атырғанын атап өтти. Оның оқыўшылары бул таңлаўға интернет арқалы сораўларға жуўап берген, нәтийжелери болса тез арада шығатуғынлығын атап өтти.

Республикамызда Шынар Альжановаға уқсаған муғаллимлеримиз көп болса, оқыўшыларымыздың халықаралық таңлаўлар менен пән олимпиадаларында нәтийжели қатнасыўына имканият жаратылады.


Ҳүрмет Атажанов,
Сүўретте: Таңлаўдан көринислер.