Соңғы жылларда елимизде раўажланып атырған спорт түрлериниң бири – регби болып табылады. Орынларда регби дөгереклериниң ашылып, оған мыңлап жасларымыздың қатнасыўы, ҳәр қыйлы жарыслардың, мәмлекет чемпионаты ҳәм кубок ойынларының өткерилиўи, регбишилеримиздиң халықаралық турнирлерге турақлы қатнасыўы бул пикиримизди дәлиллейди.

Жақында Ташкент қаласында регби-7 бойынша Өзбекистан чемпионаты ҳәм кубок ойынлары өткерилген еди. Кубок беллесиўлеринде Қарақалпақстан ер балалар сайланды командасының ағзалары барлық қарсыласларынан басым келген болса, қызларымыз финалда Ташкент қаласынан жеңилип, сыйлы екинши орынды ийеледи.

Чемпионат ойынлары да республикамыз спортшылары ушын табыслы өтти. Онда қызларымыз биринши, ер балаларымыз болса үшинши орынды қолға киргизди. Командаларымыздың бул табысларында жигитлеримизден Жеткер Базаров, Антон Михайлов, Музаффар Балтабаев, Мансур Машарипов, қызларымыздан Гүлжәҳән Генжемуратова, Гүлбанур Хожабаева, Умида Балтаева ҳәм Гүлназ Өтеповалардың қосқан үлеслери салмақлы болды.


С.Жаниев.
erkinkarakalpak.uz