Qaraqalpaq ullari a’zelden bilimli, ma’rt al, qizlari ariw, aqilli ha’m iybeli bolg’an. Usinday jaslarimiz qatarinda No’kis qalaliq 18-sanli uliwma bilim beriw mektebinin’ «Baxitli balaliq» topari Qaraqalpaqstan Respublikasi atinan Ferg’ana wa’layatinda usi jildin’ 28-mart ku’ni o’tkerilgen «En’ belsendi mektep Sa’rdarlar ken’esi Respublikaliq tan’lawinda qatnasiwg’a miyassar boldi.

Ko’rik tan’lawg’a mektep jetekshisi Qundiz Abatbaevna basshilig’inda bir qatar bilimli kamalak Sa’rdarlari qatnasti. Tan’law 3 basqishta alip barildi.
1-sha’rt «Bu bizning faoliyat» dep ataladi ha’m bunda oqiwshilarimiz mektepte sho’lkemlestirilgen Sa’rdarlar ken’esi haqqinda mag’liwmatlar beredi. Sha’rt barisinda Sa’rdarlar a’melge asirg’an jumislarin qosiq ha’m ha’r qiyli ayaq oyinlar tiykarinda ko’rsetip beriwleri lazim.

«Bizning imkoniyatlarimiz» dep atalg’an 2-sha’rtte Sa’rdarlarimiz «Kamalak» balalar sho’lkeminin’ jumislarinan kelip shig’ip, bu’gingi ku’nde balalar arasinda kelip shig’ip atirg’an mashqalalardin’ aldin aliw maqsetinde jan’a joybar islep shig’iw talap etiledi. Bul sha’rtte de shaqqan ha’m epshil oqiwshilarimiz o’z joybarlarinin’ quramalilig’i, qatnasiwshilarimizdin’ bul joybarlardi aniq tu’sindirip bergenligi to’reshiler qurami ta’repinen joqari bahalandi.

Son’g’i, yag’niy 3-sha’rt esaplang’an «Intellektual ring» toparlardin’ socialliq, siyasiy, huqiqiy, ruwxiy ha’m ma’deniy bilimlerin sinawdan o’tkerdi. Usi sha’rtte mektebimiz oqiwshilari o’zinin’ ha’r ta’repleme bilimli, yag’niy «Bilimi ku’shli min’di jig’adi» ekenligin da’liylley aldi.
Tan’law juwmag’inda mektebimizdin’ «Baxitli balaliq» topari o’z bilimi arqasinda siyli 3-orindi alip, Respublikamiz atin ko’klerge ko’terdi.

Bunday jetiskenlikke erisiwde baslang’ish sho’lkem jetekshisi Qundiz Qoshmuratovanin’ miynetleri u’lken.

Jen’is mu’ba’rek Qaraqalpaq na’wsheleri¨ Keleshegimiz bolg’an balajanlarimizg’a elede balent pa’rwazlar tileymiz¨


Dawlet.