Ha’zirgi waqıtta Respublikamız boylap 1-dekabr “Xalıqaralıq AİJSke qarsı gu’resiw ku’ni” mu’na’sibeti menen tiyisli sho’lkemler ta’repinen seminarlar, ushırasıw ha’m tan’lawlar o’tkerilip kelinbekte. Qaraqalpaqstan Respublikası Ministrler Ken’esi ta’repinen 2013-jıl 20-noyabrde “Qaraqalpaqstan Respublikasında 1-dekabr AİJSke qarsı gu’resiw ku’nine arnalıp o’tkeriletug’ın shara-ilajlar rejesi” tastiyıqlang’an bolıp, usı reje tiykarında usı jıldın’ 28-noyabr ku’ni QMU janındag’ı 1-sanlı akademiyalıq litseyde “Adam immunitet jetispewshiligi virusı infektsiyasının’ profilaktikası” temasında “En’ jaqsı shıg’arma” ko’rik tan’lawı bolıp o’tti.



Qatnasıwshılar tan’lawg’a “Biz – jaslar AIJSke qarsımız” uranı menen qatnasıp, o’zleri jazg’an shıg’armalarında erkin pikirlerin bildirdi.



Tan’law jen’impazları sho’lkemlestiriwshiler Respublikalıq AİJSke qarsı gu’resiw orayı, “Salamatlıq ha’m maditsinalıq statistika” institutı Qaraqalpaqstan Respublikası filialı, QMU janındag’ı 1-sanlı akadmiyalıq litsey, “Kamolot” JJH ta’repinen diplom ha’m hu’rmet jarlıqları menen sıylıqlandı.



Tan’law son’ında do’n’gelek stol sho’lkemlestirilip, onda qatnasıwshılar AİJS keselligine alıp keliwshi sebepler haqqında biri-biri menen pikir almastı. Qa’nigeli shıpakerler ta’repinen jaslarg’a ja’ne bir ma’rte AIV infektsiyası ha’m AİJS haqqında mag’lıwmatlar ha’m tu’sinikler berildi.


Sh. Sag’ıydullaev.