Bilesizbe gitarlar … haw … insanlar, bizin’ xojayın barg’o … iyyy … aytpaqshı, sizler menen sa’lemlesiwdi umıtıppang’o, keshirersiz “dın’-dın’”, assalawma a’leykum a’ziyz megaline ıqlasbentleri, harman’ız! Oqıw ha’m jumıs penen sharshamay ju’ripsizbe? Al, mennen sorasan’ız sol, soramasan’ızda da’rtimdi tarım menen shertip, “dın’g’ırlatıp” aytayın. Ele sol xojayın ma’selesig’o. Aldıng’ı sanda (1-bo’limde) xojayın haqqında aytqanlarım esin’izde shıg’ar ya? Kelin’ onda qurı ga’pti qoyayın da, xojayınımdı ne ushın bunsha jaman ko’retug’ınımdı aytayın:

- Boyı mırtıq, murnı geshirdey bolıp alıp, qızlar menen tanısqısı keleberetinine o’leyinbe? Bolmasa qızlar “starik”, “ujas” dep talay ma’rte aytqan, sonda da, aynag’a qarap “menin’ sırtım onsha bolmag’anı menen ishim sulıw” dep maqtanıp qoyadı. Eger bir ashıwı kelse, ashıwın mennen aladıg’o. Meni uslap aladı da, divanda sozılıp jatıp alıp, bar ku’shi menen tarlarımdı tın’g’ırlatadı, ol da jetpegendey ashıwlanıp ılaqtırıp jiberedi. Bunnan bir ha’pte burın bizin’ xojayın bir otırısqa bardı. Joraları qızlardı qushaqlap barsa, bul axmaq meni qushaqlap bardıg’o! Uyalıp ju’rdimg’o qasında. Joraları ta’wirlew shıg’ar dep oylasam, yaq, ba’ri bir “sort”tan eken. Ba’ri otırıptı iship-jep, meni bolsa sol u’ydegi 3-4 jasar mayda-shu’yde balalar qıdıqlap oynap otırdıg’o.


Nurmuhammed Jumag’ulov
su’wret: everythingemedia.com
Ha'zilkesh bo'limi | 14-may, 2013 jıl