Bir jigit sulıw qızg’a qattı ashıq bolıp, shın ju’regi menen sezim xatın jaza baslaptı. Ko’p waqıt o’tpesten, qızdan juwap xatı da kelipti. So’ytip, jigit konvertti ashsa onda hesh na’rse jazılmag’anın ko’ripti. Jigit ekinshi xattı da jiberipti. Ja’ne jigit hesh na’rse jazılmag’an appaq qag’az dı ko’redi. Hesh na’rse jazbag’anı menen, mag’an xat jolladı. Meni unatpaytug’ın bolsa xattı jibermew kerek edi degen isenim menen xat jollawın toqtatpaptı. Qız ha’m jigittin’ ha’r xatına bayag’ıday ishi bos konvertti jollay beripti. So’ytip aradan bir jıl o’tipti.

Son’ jigittin’ jollag’an xatı 99 dana bolıptı. Biraq ol neshe xat jollag’anın bilmeytug’ın edi. Bir jıl dawamında bos konvert jollag’an qızdan ja’ne konvert kelipti. Bul ha’m bos shıg’ar dep oylag’an jigit xattı ashıp ko’rmesten, tartpasına salıp qoyadı. Sonnan keyin jigit u’mitin sol qızdan ulıwma u’zipti. Aradan tag’ı bir jıl o’tkennen son’, ol basqa qızg’a u’ylenipti. Aradan ko’p waqıt o’tpesten u’yin tazalap ju’rgen kelinshegi tartpadag’ı konvertti ko’redi. Kelinshegi ha’mmesin dıqqat penen birimlep ashqannan son’ xat jazılg’an konvertke ko’zi tu’sedi. “Janım, toyg’a kiyetug’ın kiyimimdi tayarlap qoydım. Men sennen ju’z xat alıwg’a bel baylap edim. Mine endi qolıma 99-xattı aldım. Endi 100-xat kelgen ku’ni sag’an turmısqa shıg’ıwg’a wa’de beremen” dep jazılg’an edi.

Qattı ashıq bolıp su’ygen muxabbatına qolı jete almag’an jigit qattı o’kinipti. Sonda bul jigittin’ itibarsızlıg’ıma, sabırsızlıg’ıma, yamasa qızdın’ ju’da’ romantikag’a berilgeninin’ aqıbeti me?!


Tayarlag’an A. Matay