Bir filosoftın’ basınan o’tken waqıya haqqında aytamız. Ko’pshilikke atı tanıs bir filosof bar eken. Ol o’zinin’ basınan o’tkergen jag’dayların izertlep, juwmaq shıg’arıp ha’m teren’ oy menen jasaydı eken. Bir ku’ni bir sulıw qız filosofqa qattı ashıq bolıptı. “Meni qoldan jiberip alsan’ız, tap usınday muxabbatqa ekinshi ret iye bolma almaysız” dep jan’agı sulıw qız filosofqa aytıptı. Filosof qızdın’ sulıwlıg’ın qanshama unatıp tursada, “oylanıp ko’reyin” dep juwap beripti.

Usı waqıyadan keyin filosof muxabbat haqqında filosofiyalıq oylarg’a ko’milip, teren’ izlenipti. Bir ko’rip ashıq bolıp u’yleniw yamasa u’ylenbew haqqında uzaq oylanıp, bul sezimnin’ artıqmashılıg’ı menen kemshiligin salıstırıp izertlepti. Sonın’ menen bir qatarda qanday sheshimge keliw kerek? Son’ında ol “adam eki tu’rli joldı ushıratqanda o’zi ko’rmegen, basınan o’tpegen sapardı tan’lag’an maqul” degen filosofiyalıq sheshimge kelipti. Onday bolsa u’yleniwdin’de qanday bolatug’ının bastan o’tkergen maqul dep qızdın’ talabın orınlawdı maqul ko’ripti.

Filosof qızdın’ u’yine barıw ushın jolg’a atlanıptı ha’m onın’ a’kesi menen ushırasıptı. Qızdın’ a’kesi “Balam-aw, ol ha’zir eki balanın’ anası. Turmısqa shıqqanına bes jıl boldı” depti.

Bunı esitken filosof tawdan qulap tu’skendey bolıptı. Onın’ maqtanıshı bolg’an oyı o’zine qa’siret alıp kelipti. Ol qansha waqıt muxabbat haqqında oylasada, sezimnin’ jalt etip o’shetug’ının muxabbattın’ ku’tpeytug’ının bilmegen eken. Keyin ol muxabbat haqqında mınanday juwmaqqa kelipti: “o’mirdin’ birinshi jartısı ta’wekel menen, keyingi jartısı o’kiniw menen o’tpegen maqul”

ULIWMA ALG’ANDA BUL SEZİM HESH QANDAY QAG’IYDAG’A , FİLOSOFİYALIQ OYG’A BAG’INBAYTUG’IN JALG’IZ HA’M ULLI SEZİM – MUXABBAT.